" എന്റെ പ്രിയേ, നീ സുന്ദരിയാണ്‌
നീ അതീവ സുന്ദരി തന്നെ
നിന്റെ അധരം ചെന്നൂല് പോലെയാണ്
നിന്റെ മിഴികള്‍ മധു ഊറുന്നതാണ്
നിന്റെ കണ്ണുകള്‍ ഇണപ്രാവുകളെ പ്പോലെയാണ്
നിന്റെ കവിളുകള്‍ മാതളപ്പഴ പകുതികള്‍ പോലയാണ് "
ഉത്തമഗീതാകാരന്റെ വരികള്‍ കേട്ടവള്‍ സ്തബ്ധയായിരുന്നു
പിന്നീടപ്പോഴോ കണ്ണുകള്‍ ഉയര്‍ത്തി.
അവളുടെ കണ്ണുകളിലേക്കു നോക്കിയിരിക്കെ
അവളെന്നോട് ചോദിച്ചു:
എന്താ നീ ഇങ്ങനെ നോക്കുന്നതെന്ന്?
സ്വരമുയര്‍ത്താതെ ഞാന്‍ പറഞ്ഞു:
"ഞാന്‍ പാടിയതും, നീ ചൊല്ലിതരുന്നതുമായ പലതും
ഈ കണ്ണുകളില്‍ ഞാന്‍ കണ്ടു"
ഞാന്‍ പിന്നെയും പാടി
"നിന്റെ ഹൃദയം എനിക്ക് അസ്തമന നിറശോഭയാണ്
ജീവന്റെ നിശ്വാസമാണ്
പകലാണ്‌, രാത്രിയാണ്, നീ മഴയാണ്
മരുഭൂമിയിലെ തണലാണ്‌, മരുപ്പച്ചയാണ്‌
പ്രണയം ദീര്‍ഘമൌനമാണ് "
പിന്നീടൊരിക്കല്‍ അവളെന്നോട് പറഞ്ഞു
"നിന്റെ നോട്ടം പണ്ടത്തെപ്പോലിരിക്കുന്നു
നിനക്ക് സുഖമോ?"
ഞാന്‍ പറഞ്ഞു " നീ ഒത്തിരി മാറിപ്പോയിരിക്കുന്നു"
കേള്‍കാത്ത ഈണം കൂടുതല്‍ ഇമ്പ മുള്ളതെന്ന് പാടിയതേത് ഗായകന്‍ ?
സഫല മാകാത്ത പ്രണയം മധുരതരമെന്നു പാടിയതേത് കവി ?
-കെ എ സോളമന്‍
No comments:
Post a Comment