ചായക്കണക്ക് - കഥ'

കോളജിലെ തന്റെ സർവീസിന്റ ഭാഗമായി ടീച്ചേഴ്സിന് ചായ വാങ്ങിക്കൊടുക്കുന്ന ചുമതല ചെല്ലപ്പൻ ചേട്ടൻ സ്വയം ഏറ്റെടുത്തു ചെയ്യുമായിരന്നു. രാവിലെ 11 മണിക്കും ഉച്ചതിരിഞ്ഞു 3 മണിക്കും ചായ. എല്ലാവർക്കും ആവശ്യമില്ലെങ്കിലും രണ്ടു നേരവും കൂടി 60 ചായക്ക് ആവശ്യക്കാരുണ്ടായിരുന്നു.

കോളജിനു എതിർവശമുള്ള പത്മനാഭന്റെ കടയിൽ നിന്നു വാങ്ങും. പത്മനാഭൻ,  ഒറ്റച്ചായ എടുക്കുന്നതിൽ അതിവിദഗ്ധൻ. 50 പേരു് ഒരുമിച്ചു ചെന്നാലും പത്മനാഭൻ ഒറ്റച്ചായയെ എടുക്കൂ. ചേർത്തല താലൂക്കിൽ കിട്ടവുന്ന ഏറ്റവും മികച്ചചായ. എത്ര ലോറിക്കാരാണ് പത്മനാഭന്റെ ചായ കുടിക്കാൻ വണ്ടി നിർത്തുന്നത്.

ചെല്ലപ്പൻചേട്ടൻ രാവിലെ 11 മണിക്കു തന്നെ എല്ലാ ചായയും പത്മനാഭനെക്കൊണ്ടു എടുപ്പിച്ച്  വിതരണത്തിന് എത്തും. ഫസ്റ്റ് പീരിയഡ് ക്ളാസും കഴിഞ്ഞ് ക്ഷീണിച്ചു ഡിപ്പാർട്ടുമെന്റിലെത്തുന്ന സാറന്മാർക്ക് ചായകൊടുത്തിരിക്കണം എന്ന വാശി എന്നും ചെല്ലപ്പൻ ചേട്ടനുണ്ടായിരുന്നു.

പക്ഷെ ഇതിന്റെ കണക്ക് സൂക്ഷിക്കുകയെന്നത് വലിയ പ്രശ്നമായിരുന്നു എപ്പോഴും.. കണക്കെഴുതാൻ 200 പേജിന്റെ കോമ്പസിഷൻ ബുക്ക് ഉണ്ടെങ്കിലും ചിലപ്പോൾ കണക്കു പിശകും. പോരാത്തതിന് കുടിക്കുന്ന ചായയ്ക്ക് പ്രത്യേകം കണക്കു സൂക്ഷിക്കുന്ന ഒറുപ്പമാരായ ചില സാറന്മാരുമുണ്ട്'. അവരുടെ കണക്കിന്റെ കാര്യത്തിൽ ചെല്ലപ്പൻ ചേട്ടൻ അതീവ ശ്രദ്ധ പുലർത്തുകയും ചെയ്തു.

സ്ത്രീകളായ ടീച്ചേഴ്സിന്റെ കാര്യത്തിൽ ഈ ജാഗ്രത പുലർത്താൻ കഴിഞ്ഞില്ല. അതിന്റെ കാരണം അവരുമായി ഇടപഴകാൻ അധികംഅവസരം ഇല്ലായിരുന്നുവെന്നതാണ് .

ലേഡി ടീച്ചേഴ്സിൽ പീസമ്മ ടീച്ചറിന്റെ പേരല്ലാതെ ചായ കുടിക്കുന്ന മറ്റാരു ടീച്ചറിന്റെയും പേര് അറിയില്ലായിരുന്നു. അതു കൊണ്ട് ചായയുടെ മാസക്കണക്ക് എഴുതി സൂക്ഷിച്ചത് ഇങ്ങനെ..
പീസമ്മ ടീച്ചർ-30 ചായ
മറ്റേ പീസമ്മ ടീച്ചർ-25 ചായ
ഇംഗ്ലീഷിലെ പീസമ്മ ടീച്ചർ-28 ചായ
ഇക്കണോമിക്സിലെ വെളുത്ത പീ . . .
                           - - - - - -
കെ എ സോളമൻ