കറുത്തവാവ് -കവിത

#കർക്കിടകവാവ്

കർക്കിടകക്കറുത്തവാവിൻ

നിശബ്ദമാം പുലരി വന്നു,

പിതൃക്കൾതൻ സ്മരണയിൽ കണ്ണീർ-

ത്തിരയായ് തീരങ്ങളാകെ

എള്ളും ജലവും പൂവുമായി

മക്കൾ വന്നണയുന്നു തീരേ,

ബലിപ്പുല്ലു കൈയിലേന്തി

തർപ്പണം നൽകുന്നു ഭക്തിയോടെ.

ആലുവാമണൽത്തട്ടിലെത്തി

തിരുനെല്ലിക്കാടിൻ മടിയിൽ,

തിരുവല്ലം കടൽത്തീരത്തും

വർക്കലയിലും വാവുനാളിൽ,

പിതൃക്കൾക്കായ് പ്രാർത്ഥനയോടെ

നൽകുമീ തിലതർപ്പണങ്ങൾ,

മോക്ഷമായ് ശാന്തിയായ് മാറി

അനുഗ്രഹമായ് കറുത്തവാവ്.

-കെ എ സോളമൻ