Friday, 6 November 2026

ഡിജിറ്റൽ സർവേ തട്ടിപ്പും ജന ദുരിതവും

#ഡിജിറ്റൽസർവേ_തട്ടിപ്പും_ജനദുരിതവും: #റവന്യൂ_വകുപ്പിൽ_ഉടൻ_അഴിച്ചുപണി_വേണം
​റവന്യൂ മന്ത്രി എ.പി. അനിൽകുമാർ പുതിയ കെ.പി.സി.സി. പ്രസിഡന്റാകാൻ സാധ്യതയുണ്ടെന്ന റിപ്പോർട്ടുകൾ സ്വാഗതാർഹമാണ്. അങ്ങനെ സംഭവിക്കുകയും അദ്ദേഹം മന്ത്രിസ്ഥാനം ഒഴിയുകയും ചെയ്താൽ അത് ജനങ്ങൾക്ക് വലിയൊരു ആശ്വാസമായിരിക്കും. കാരണം, അഴിമതിയുടെ ഈജിയൻ തൊഴുത്തായി മാറിയ റവന്യൂ വകുപ്പിനെ നേരെയാക്കാൻ നിലവിലെ മന്ത്രിക്ക് സാധിച്ചിട്ടില്ലെന്നത് അദ്ദേഹത്തിന്റെ ഇതുവരെയുള്ള പ്രവർത്തനങ്ങൾ വ്യക്തമാക്കുന്നു.

​കഴിഞ്ഞ സർക്കാരിന്റെ കാലത്ത് നടപ്പിലാക്കിയ 'ഡിജിറ്റൽ സർവേ' എന്ന മഹാതട്ടിപ്പ് റവന്യൂ വകുപ്പിലെ വൻ അഴിമതിക്കും ജനദ്രോഹത്തിനുമാണ് വഴിവെച്ചത്. ഡിജിറ്റൽ സർവേയുടെ പേരിൽ ഭൂമിയുടെ തരം മാറ്റിയും വിസ്തീർണ്ണത്തിൽ കൃത്രിമം കാണിച്ചും സാധാരണക്കാരായ ഭൂവുടമകളെ നെട്ടോട്ടമോടിക്കുന്ന കാഴ്ചയാണ് കേരളത്തിലുടനീളം കാണുന്നത്. വില്ലേജ് ഓഫീസുകളിൽ കരമടക്കാൻ ചെല്ലുമ്പോൾ, ഭൂമിയുടെ അളവിൽ വ്യത്യാസമുണ്ടെന്നോ തരം മാറിയെന്നോ പറഞ്ഞ് ജനങ്ങളെ മടക്കി അയക്കുകയാണ്.

​ഭൂഉടമകളുടെ അഭാവത്തിൽ ഡിജിറ്റൽ സർവേയുടെ മറവിൽ ഭൂമി തട്ടിയെടുക്കാൻ റവന്യൂ ഉദ്യോഗസ്ഥർ കൂട്ടുനിന്നു എന്ന ഗുരുതരമായ ആരോപണമാണ് ഉയരുന്നത്. വില്ലേജ്, താലൂക്ക് ഓഫീസുകൾ കയറിയിറങ്ങിയും കോടതികളെ സമീപിച്ചും പതിനായിരക്കണക്കിന് ആളുകൾ പരാതി നൽകിയിട്ടും റവന്യൂ വകുപ്പിന്റെ ഭാഗത്തുനിന്ന് യാതൊരു പരിഹാരവും ഉണ്ടായിട്ടില്ല. മാധ്യമങ്ങളിൽ ദിനംപ്രതി ഇതേക്കുറിച്ചുള്ള വാർത്തകൾ വന്നിട്ടും റവന്യൂ മന്ത്രി നിഷ്ക്രിയത്വം തുടരുകയാണ്.

എ.പി. അനിൽകുമാർ ഈ സ്ഥാനത്ത് തുടരുന്നിടത്തോളം കാലം ഈ പ്രശ്നങ്ങൾക്ക് പരിഹാരമുണ്ടാകില്ലെന്ന് ജനങ്ങൾ ഉറച്ചു വിശ്വസിക്കുന്നു.
​അതുകൊണ്ട്, എ.പി. അനിൽകുമാറിനെ മാറ്റുകയും കാര്യശേഷിയും ഇച്ഛാശക്തിയുമുള്ള ഏതെങ്കിലും ചെറുപ്പക്കാരനായ ജനപ്രതിനിധിയെ റവന്യൂ മന്ത്രിയായി നിയമിക്കുകയും ചെയ്യേണ്ടത് അത്യന്താപേക്ഷിതമാണ്. 

ഡിജിറ്റൽ സർവേയുടെ പേരിൽ സാധാരണക്കാരെ ഇനിയും ബുദ്ധിമുട്ടിക്കരുത്. റവന്യൂ വകുപ്പിലെ ഈ വൻ ക്രമക്കേടുകൾ പരിഹരിച്ച് ജനങ്ങൾക്ക് നീതി ഉറപ്പാക്കാൻ സർക്കാരിന്റെ ഭാഗത്തുനിന്ന് അടിയന്തര ഇടപെടൽ ഉണ്ടാകണമെന്ന് അഭ്യർത്ഥിക്കുന്നു.
​- കെ. എ. സോളമൻ

Thursday, 15 October 2026

ആദ്യാക്ഷരം മാർക്കറ്റ് ചെയ്യുമ്പോൾ

#ആദ്യാക്ഷരം #മാർക്കറ്റ് #ചെയ്യുമ്പോൾ!
​വിദ്യാരംഭം എന്നത് കേവലമൊരു ആത്മീയ ചടങ്ങല്ല; മറിച്ച് കച്ചവട സാധ്യതകളുടെ മഹോത്സവമാണ്! കുരുന്നുകൾ അറിവിന്റെ ലോകത്തേക്ക് ചുവടുവെക്കുന്ന ഈ അപൂർവ്വ നിമിഷം കൊഴുപ്പിക്കാൻ കൈയ്യും മെയ്യും മറന്ന്  നിൽക്കുകയാണ് നമ്മുടെ പൊതുസമൂഹം. 

പുഴപോലെ  ഒഴുകിയെത്തുന്ന കുരുന്നുകളും അവരുടെ രക്ഷിതാക്കളും ചേരുമ്പോൾ ക്ഷേത്രപ്പറമ്പുകൾ പെട്ടെന്ന് വമ്പൻ റീട്ടെയിൽ ഔട്ട്‌ലെറ്റുകളായി മാറുകയാണ് പതിവ്. ​ക്ഷേത്രങ്ങളിൽ കുരുന്നുകളെ നാവിൽ ഹരിശ്രീ കുറിച്ച് അക്ഷരലോകത്തേക്ക് ആനയിക്കാൻ ഇരിക്കുന്നത് പലപ്പോഴും അക്ഷരജ്ഞാനത്തെക്കാൾ അല്പവിദ്യാഭ്യാസം മാത്രമുള്ള ചില പൂജാരിമാരാണ്. അതു പോട്ടെ, 'അക്ഷരമെഴുതിച്ചില്ലെങ്കിലും മന്ത്രം ചൊല്ലാൻ അറിയാമല്ലോ' എന്ന് ആശ്വസിക്കാം. എന്നാൽ യഥാർത്ഥ വില്ലന്മാർ പ്രത്യക്ഷപ്പെടുന്നത് ഇതിനുശേഷമാണ്! 

പോസ്റ്റൽ ഡോക്ടറേറ്റ് നേടിയവരും ഞാൻ ഇന്നലെ ഡോക്ടറായി എന്ന കഥാപ്രസംഗം നടത്തുന്ന ചില വികട സാംസ്കാരികന്മാരും ആദ്യാക്ഷരവേദിയിൽ ഉണ്ട്.
​ചാനൽ ക്യാമറകളുടെ ഫ്ലാഷ് ലൈറ്റുകൾ തിളങ്ങുമ്പോൾ, വെള്ളയും വെള്ളയും ധരിച്ച് 'അഭിനവ മഹർഷിമാർ' ആവേശഭരിതരാകും.  ഇത്തരം രാഷ്ട്രീയ ഗുരുക്കന്മാരുടെ മുന്നിലേക്ക് കുഞ്ഞുങ്ങളെ തള്ളിവിടുമ്പോഴാണ് കരയേണോ ചിരിക്കണോ എന്ന് അറിയാത്ത അവസ്ഥ ഉണ്ടാകുന്നത്. 

നാടിന് നാശം മാത്രം സംഭാവന ചെയ്യുന്ന രാഷ്ട്രീയക്കാരും എഴുത്തിന്നു റെഡി. കുഞ്ഞിന്റെ നാവിൽ വിരൽ തൊടുമ്പോൾ വരക്കുന്നത് പാർട്ടി ചിഹ്നമോ  കൊടിയുടെ നിറമോ ആകാം.. ഇത്തരം നേതാക്കളുടെ വിരൽത്തുമ്പിൽ നിന്ന് അറിവ് നേടുന്ന കുഞ്ഞുങ്ങളുടെ ഭാവി  ഏത് തലതിരിഞ്ഞ വഴിക്ക് തിരിയുമോ എന്തോ!

​ഇതിലും വലിയ തമാശ ചില രക്ഷിതാക്കളുടെ ജാഗ്രതയാണ്. ഇവർ ഇൻഷുറൻസ് പോളിസി എടുക്കുന്നതുപോലെയാണ് 'ആദ്യാക്ഷരം എഴുതിക്കുന്നത്. ​"ഒരു ഗുരു പിഴച്ചാൽ അടുത്ത ഗുരു രക്ഷിക്കും" എന്നതാണ് പോളിസി.  രാവിലെ ആറുമണിക്ക് ക്ഷേത്രപൂജാരിയെക്കൊണ്ട് എഴുതിക്കും. 'ക്ഷേത്രത്തിലെ ഗുരുവിന് ക്വാളിറ്റി പോരെങ്കിലോ, കട്ടിംഗ് എഡ്ജ് ആകാതിരുന്നാലോ' എന്ന പേടി കാരണം അടുത്ത സ്റ്റോപ്പ്  പ്രമുഖ പത്രമാപ്പീസിലാണ്! അവിടെയിരിക്കുന്ന സാംസ്കാരിക നായകനായ വരിയെഴുത്ത് ഗുരുവിനെക്കൊണ്ട് അടുത്ത റൗണ്ട് എഴുതിയ്ക്കും! രണ്ടു പേരും ഒരുമിച്ച് തോറ്റുകൊടുക്കില്ലെന്ന ഉറച്ച വിശ്വാസമാണ് ഈ രക്ഷിതാക്കളുടെ ആത്മബലം.

 പോരാത്തതിന് ചിലർ ഇപ്പോൾ 'പാക്കേജ് വിദ്യാരംഭവും' അന്വേഷിച്ചു തുടങ്ങിയിട്ടുണ്ട്. ഒന്നാമത്തെ ഗുരു അക്ഷരം എഴുതിക്കും, രണ്ടാമത്തെ ഗുരു ഇൻസ്റ്റാഗ്രാം റീൽസിന് വേണ്ടിയുള്ള ക്ലോസ് അപ്പ് ഷോട്ട് എടുത്തു കൊടുക്കുകയും ചെയ്യും.. ഇത്തരം റീൽസിൽ വാ പൊളിച്ചിരിക്കുന്ന കുഞ്ഞിനെയും കുഞ്ഞിൻറെ വായ് പൊളിക്കാൻ വേണ്ടി വായ് പൊളിച്ചു കാണിക്കുന്ന ഗുരുവിന്റെയും ഇതുകണ്ട് വാ പൊളിക്കുന്ന രക്ഷിതാക്കളുടെയും ക്ലോസപ്പ് ചിത്രങ്ങൾ കാണാം

​നാളെ കുട്ടി വലുതായി വല്ല സിവിൽ സർവീസോ സയന്റിസ്റ്റ് പദവിയോ നേടുമ്പോൾ "ഞാൻ അന്ന് രണ്ട് പ്രീമിയം ഗുരുക്കന്മാരെക്കൊണ്ട് ഡബിൾ ഡോസ് ഹരിശ്രീ എഴുതിച്ചതുകൊണ്ടാ!" എന്ന് വാട്സാപ്പ് ഗ്രൂപ്പുകളിൽ അഭിമാനത്തോടെ മെസ്സേജ് അയയ്ക്കാം!

​ചെറിയൊരു ചടങ്ങിനെ പോലും ഇത്തരത്തിൽ മെഗാ ഇവന്റാക്കി മാറ്റി, വിദ്യാരൂപിയായ സരസ്വതീദേവിയെ നിലത്തിരുത്തി കച്ചവടം നടത്തുന്ന നിലവാരമില്ലായ്മക്കെതിരെ ആരും ചിന്തിക്കില്ല. അക്ഷരം എന്നത് വിപണിയിലെ ഉൽപ്പന്നമല്ലെന്നും, ആദ്യാക്ഷരം കുറിക്കൽ ലൈക്കുകൾക്കും കമന്റുകൾക്കും വേണ്ടിയുള്ള ഫോട്ടോഷൂട്ട് അല്ലെന്നും ആരോട് പറയാൻ ?

- കെ എ സോളമൻ

Sunday, 20 September 2026

ഓർമ്മയുടെ തീരങ്ങളിൽ (കവിത റിപോസ്റ്റ് )

#ഓർമയുടെ #തീരങ്ങളിൽ
 കവിത 

ഓർക്കാനേറെയുണ്ട്            
പക്ഷെ ഓർത്തു നോക്കാൻ ഭയം.                  ഓർമ്മ വന്നാൽഉറക്കം ദൂരേയ്ക്ക് ഒഴുകിപ്പോകും,
രാത്രികൾ തീർന്നാലും തീരാത്ത യാത്രയായി.

നെഞ്ചിൽ തീ പടർത്തിയ
പ്രണയ നിമിഷങ്ങൾ,
കഥകളായും കവിതകളായും
സ്വപ്നങ്ങളായും ഇന്നും കൂടെയുണ്ട്
ദുഃഖവും ഭാവസാന്ദ്രതയും ചുമന്ന്
ഒരു നിഴലായ് കൂട്ടിനൊപ്പം.

പഴയ കടലാസുകൾ, ഡയറിക്കുറിപ്പുകൾ,
വായിക്കരുതെന്ന് പറയുമ്പോഴും
വായിക്കാതെ വയ്യ,
വിധിയാകാതെ പോയ
സ്വപ്നക്കുരുക്കുകൾ
വീണ്ടും വിരിയുന്നു, രൗദ്രഭാവങ്ങളിൽ

പാടിയ വരികളിലും മധുരം,
പക്ഷെ പാടാതെ പോയവയിൽ
ഇനിയും വേദനിച്ചുനിൽക്കുന്ന രാഗം.
എഴുതിയ കഥകളിലും സൗന്ദര്യം,
പക്ഷെ എഴുതാത്തവയിൽ
അതിലേറെ നിശ്ശബ്ദ സുഗന്ധം.

എന്തിനുവേണ്ടി?
എഴുതണം, പാടണം, ഓർക്കണം?
എന്തെന്നാൽ അവയൊക്കെയാണ്
ജീവിതം
ഹൃദയം പൊള്ളിക്കുന്ന
മൗനഗാഥകൾ.
ഇന്നും ഹൃദയം പൊള്ളിക്കുന്ന
മൗനഗാഥകൾ

- കെ എ സോളമൻ
(ഫോട്ടോ. ലന്താന പൂവുകൾ)

Thursday, 10 September 2026

ചെമ്മീൻ സിനിമ

#ചെമ്മീൻസിനിമ

കാലമേറെ കഴിഞ്ഞിട്ടും മനസ്സില്‍ മായാതെ  നിൽക്കുന്ന സിനിമയാണ് തകഴിയുടെ, രാമകാര്യട്ടിന്റെ ചെമ്മീൻ. പരീക്കുട്ടിയും പളനിയും കറത്തമ്മയും ചെമ്പന്‍കുഞ്ഞുമൊക്കെ മധു, സത്യൻ, ഷീല, കൊട്ടാരക്കര എന്നിവരുടെ രൂപത്തിൽ ഓർമയിൽ വന്നുപോകുന്നു. വയലാർ -സലിൽ ചൗധരി ഒരുക്കിയ ഗാനങ്ങൾ നിത്യ സുഗന്ധികളായി ആയിരങ്ങളെ രസിപ്പിച്ച് ഇന്നും നിലനിൽക്കുന്നു.

ചെമ്മീൻ സിനിമ ആദ്യമായി കണ്ട അനുഭവം ഓർത്തെടുക്കുന്നത് രസകരമാണ്. സിനിമ റിലീസ് ചെയ്തത് ആയിരത്തി തൊള്ളായിരത്തി അറുപത്തിയഞ്ച് ഓഗസ്റ്റിൽ. എട്ടാം ക്ലാസിൽ പഠിക്കുന്ന കാലം.

ചേർത്തല ഭവാനി തീയേറ്റർ റിലീസിംഗ് സെൻറർ അല്ലാതിരുന്നതിനാൽ ആഴ്ചകൾ പിന്നിട്ടാണ് ചെമ്മീൻ സിനിമ അവിടെ പ്രദർശനത്തിന് എത്തുന്നത്. നല്ല സിനിമയ്ക്കുള്ള ഇന്ത്യൻ പ്രസിഡന്റിന്റെ  സ്വർണ്ണ മെഡൽ നേടിയ ചെമ്മീനിന്   മലയാളത്തിലെ ആദ്യത്തെ കളർസിനിമ എന്ന ഖ്യാതി കൂടി ഉണ്ടായിരുന്നു.  സിനിമ കാണാൻ ജനങ്ങളുടെ വൻ തിരക്കായിരുന്നു.

സിനിമയുടെ വിശേഷം ക്ലാസിലെ കുട്ടികൾ പറഞ്ഞു കേട്ടപ്പോൾ ആ സിനിമ എങ്ങനെയും കാണണമെന്നായി ആഗ്രഹം.  പക്ഷേ തടസ്സമായിനിന്നത്  സിനിമ കാണുന്നതിനുള്ള പണം കണ്ടെത്തുക എന്നതായിരുന്നു. ടിക്കറ്റിനുള്ള പണം മാത്രം പോരാ, യാത്രയ്ക്കുള്ള ബസ് ഫെയറും  ഒരു പാട്ട് പുസ്തകം വാങ്ങുന്നതിനുള്ള കാശും വേണമായിരുന്നു. ഇന്ന് കണ്ടുകിട്ടാനില്ലാത്ത സിനിമപാട്ട് പുസ്തകം അന്നു വലിയ ഹിറ്റായിരുന്നു

കാശ് എങ്ങനെയോ സംഘടിപ്പിച്ചു എന്നു പറഞ്ഞാൽ മതി

സിനിമ തുടങ്ങുന്നതിന് രണ്ട് മണിക്കൂർ മുമ്പു തന്നെ തിയറ്ററിൽ എത്തി.  ടിക്കറ്റ് കൗണ്ടറിന്റെ മുന്നിലായി പാട്ടുപുസ്തകങ്ങൾ നിരത്തി തൂക്കിയിട്ടിരിക്കുന്നു.  മനോഹരമായ കടലാസിൽ പ്രിൻറ് ചെയ്ത പാട്ടുപുസ്തകം. ഓരോ പേജിലും സ്വർണ്ണ മെഡലിന്റെ വാട്ടർ മാർക്ക് പ്രിൻറ് ചെയ്തിരുന്നു. അതിനു മുകളിലാണ് ഗാനങ്ങൾ എല്ലാം അച്ചടിച്ചിരുന്നത്. പാട്ടുപുസ്തകം ഒരെണ്ണം സ്വന്തമാക്കി പാട്ടുകൾ ഉരുവിട്ട് നോക്കി.  പാടാൻ അറിയാത്തതിൽ വളരെ വിഷമം തോന്നിയ നിമിഷം. പാട്ടു പാടുക ഒരു പ്രത്യേക സിദ്ധിയാണന്നും എല്ലാവർക്കും നന്നായി പാടാനാവില്ല എന്ന തിരിച്ചറിവ്  ഉണ്ടായിരുന്നതും  ഗൃണം ചെയ്തു

തറയിൽ ഇരുന്ന് സിനിമ കാണുന്നത് രസമാണ്. സ്ക്രീനിലേക്ക് നോക്കാൻ തല അല്പം ഉയർത്തണമെന്ന് മാത്രം കുറച്ചുകഴിയുമ്പോൾ എല്ലാം നോർമൽ .

മാറ്റിനി സിനിമയാകുമ്പോൾ മുൻ ഷോ കണ്ടവരുടെ തുപ്പൽ അവശിഷ്ടം തറയിൽ വീഴാത്തതിനാൽ മണ്ണ് മാറ്റി ഇരിപ്പിടം വൃത്തിയാക്കേണ്ട സാഹചര്യമൊന്നുമില്ലായിരുന്നു. ചെറുപ്പക്കാർ ഉൾപ്പെടെ ഒട്ടുമിക്കവരുടെയും സ്ഥിരംകലാപരിപാടി ആയിരുന്നു അന്ന് വെറ്റില മുറുക്ക് .
 
തിയേറ്ററിനകത്ത്  സിനിമാസ്വാദകർ തുപ്പുന്ന കാലമായിരുന്നു അത്. ആ ശീലം ക്രമേണ മാറി.  ഇന്ന് ആരും തിയേറ്ററിനകത്തു തുപ്പാറില്ല, തിയറ്ററിൽ കാണിക്കുന്ന ചില സിനിമകൾ അങ്ങനെ ചെയ്യാൻ പ്രേരിപ്പിക്കുന്നതാണെങ്കിൽ പോലും

തിരക്ക് കാരണം വളരെ പണിപ്പെട്ടാണ് ടിക്കറ്റ് എടുത്തത്..സിനിമയ്ക്ക് വരവും കാഴ്ചയും ഒറ്റയ്ക്കായതുകൊണ്ട് സ്വന്തമായി തന്നെ ടിക്കറ്റ് എടുക്കേണ്ട അവസ്ഥയായിരുന്നു. 

ഏറെ തിങ്ങി ഞെരുങ്ങിയാണ് തറയിലിരുന്ന് സിനിമ കണ്ടത്. ഏതാണ്ടൊക്കെ അന്നു മനസ്സിലായി. പക്ഷേ പരീക്കുട്ടിയെയും കറുത്തമ്മയേയും ഒടുക്കം കൊല്ലണ്ടായിരുന്നു എന്ന ചിന്ത അന്ന് തോന്നിയിരുന്നു.

പ്രേമിച്ചു തുടങ്ങാൻ സംഭാഷണം എങ്ങനെ വേണം എന്നത് ആ സിനിമ കണ്ടപ്പോഴാണ് പഠിച്ചത്. പക്ഷേ ആ സമ്പ്രദായം വിജയകരമായി പ്രയോഗിക്കാൻ ഒരു ചാൻസ് കിട്ടിയില്ല എന്നത് ഒരു ദുഃഖസത്യമായി ഇന്നും അവശേഷിക്കുന്നു 

സിനിമയിലെ ആദ്യ ഡയലോഗുകൾ എവിടെയോ വായിച്ചതിങ്ങനെ ? പരീക്കുട്ടിയും കറുത്തമ്മയും കൂടിയുള്ള സംഭാഷണമാണ്.

"എന്റെ അച്ചേ വള്ളോം വലേം മേടിക്കാനെക്കൊണ്ടു പോവ്വാണേല്ലോ"".
""കറത്തമ്മേടെ ഭാഗ്യം!""
കറത്തമ്മയ്ക്ക് ഉത്തരം മുട്ടിപ്പോയി.  അവള്‍ പറഞ്ഞു. ""പഷ്ഷേല് രൂപ തെകായാത്തീല്ല. ഞങ്ങക്ക് കുറെ രൂപ തരാവോ?""
""എന്റെ കൈയിലെവടന്നാ രൂപാ?"" പരീക്കുട്ടി കൈ മലര്‍ത്തിക്കാണിച്ചു.
കറത്തമ്മ ചിരിച്ചു. ""പിന്നെന്തീനാ വല്യ കൊച്ചു മൊതാലാളി ആന്നും പറഞ്ഞു നടാക്കുന്നെ?""
""എന്നെ എന്തിനാ കൊച്ചു മുതലാളീന്നു കറത്തമ്മ വിളിക്കുന്നെ?"".
""പിന്നെന്നാ വിളിക്കണം?"",
""പരീക്കുട്ടീന്നു വിളിക്കണം"".
കറത്തമ്മ "പരീ" എന്നോളം ശബ്ദിച്ചു. എന്നിട്ടു പൊട്ടിച്ചിരിച്ചു. ആ വിളി മുഴുവനാക്കാന്‍ പരീക്കുട്ടി ആവശ്യപ്പെട്ടു. കറത്തമ്മ ചിരി അടക്കിയിട്ട് ഗൗരവം ഭാവിച്ച്, "ഇല്ല" എന്നു തലകുലുക്കി എന്നിട്ടവള്‍ പറഞ്ഞു:
""ഞാന് വിളിക്കാത്തീല"".
""എന്നാല്‍ ഞാന്‍ കറത്തമ്മേന്നും വിളിക്കത്തില്ല"".
""പിന്നെന്താ എന്നേം വിളീക്കാമ്പോണേ?""
""ഞാന്‍ വല്യ മരക്കാത്തീന്നു വിളിക്കും"".

കറത്തമ്മ പൊട്ടിച്ചിരിച്ചു. പരീക്കുട്ടിയും പൊട്ടിച്ചിരിച്ചു. നീണ്ടുനീണ്ട ചിരി. എങ്ങനെ എന്തിനായി അവര്‍ അങ്ങനെ ചിരിച്ചു? 
ആ ചിരിയുടെ പൊരുൾ എട്ടാം ക്ലാസ് കാരനും മനസ്സിലാകുമായിരുന്നു

സിനിമ കാണുന്നതിനിടയിലും പാട്ടുപുസ്തകം മുറുകെ പിടിച്ചിരുന്നു വീട്ടിൽ ചെന്ന് പാട്ടുപാടി രസിക്കാൻ.

പക്ഷേ ഞെട്ടിപ്പോയത് പുറത്തിറങ്ങി  പോക്കറ്റിൽ കൈ ഇട്ടപ്പോഴാണ്.  മടക്കയാത്രയ്ക്കുള്ള വണ്ടിക്കൂലി ടിക്കറ്റ് കൗണ്ടറിലെ തിരക്കിൽ നഷ്ടപ്പെട്ടിരിക്കുന്നു !

പിന്നീട് ഒന്നും ആലോചിച്ചില്ല , ചേർത്തല നിന്ന് വീട്ടിലേക്ക് നടന്നു, ആറു കിലോമീറ്റർ ദൂരം. ചെമ്മീൻ സിനിമയിലെ രംഗങ്ങൾ ഓരോന്നായി മനസ്സിലൂടെ കടന്നുപോയിക്കൊണ്ടിരുന്നതിനാൽ ആറ് കിലോമീറ്റർ നടപ്പ് അത്ര വലിയ പ്രയാസമുള്ളതായി തോന്നിയില്ല. പിറ്റേദിവസം സ്കൂളിൽ നടക്കാനിരിക്കുന്ന പരീക്ഷയെ കുറിച്ചുള്ള ചിന്തകളും അലോസരപ്പെടുത്തിയില്ല.

പിന്നീടുള്ള ദിവസങ്ങളിൽ പാട്ടുപുസ്തകത്തിലെ പാട്ടുകൾ പാടി രസിക്കുക, മറ്റുള്ളവരെ രസിപ്പിക്കാൻ നോക്കുക  എന്നുള്ളതായിരുന്നു പരിപാടി. പക്ഷേ ആവശ്യക്കാർ തീരെ ഇല്ലാതിരുന്നതിനാൽ എങ്ങനെയോ ആ കലാവാസന അപ്രത്യക്ഷമായി.

-കെ എ സോളമൻ (10-9-2022)

Tuesday, 1 September 2026

മഴ വരകൾ -കഥ by ഗീതു കൃഷ്‌ണ. അവലോകനം

മഴവരകൾ: അതിജീവനത്തിന്റെയും ആത്മാനുരാഗത്തിന്റെയും മനോഹര ചിത്രം

​ജീവിതത്തിലെ തകർച്ചകളിൽ തളർന്നുപോകാതെ, സ്വന്തം സ്വത്വവും ആത്മാഭിമാനവും കണ്ടെത്തി മുന്നേറുന്ന ഒരു സ്ത്രീയുടെ അതിജീവന കഥയാണ് ഗീതു കൃഷ്ണയുടെ 'മഴവരകൾ'. മനോഹരമായ പശ്ചാത്തല വിവരണങ്ങളിലൂടെയും വൈകാരികമായ സംഭാഷണങ്ങളിലൂടെയും വായനക്കാരുടെ മനസ്സിലേക്ക് കൃഷ്ണ എന്ന കഥാപാത്രത്തെ പ്രതിഷ്ഠിക്കാൻ  കഥാകാരിക്ക് സാധിച്ചിട്ടുണ്ട്.

​ഒരു കോഫി ഷോപ്പിലെ ജനൽച്ചില്ലിൽ പെയ്യുന്ന മഴത്തുള്ളികൾ വരയ്ക്കുന്ന വരകളിൽ നോക്കിയിരിക്കുന്ന കൃഷ്ണയിൽ നിന്നാണ് കഥ ആരംഭിക്കുന്നത്. ഒരുകാലത്ത് പ്രണയത്തിലും ബന്ധങ്ങളിലും തനിക്കുവേണ്ടി ജീവിക്കാൻ മറന്നുപോയ അവൾ, ഇന്ന് സ്വന്തം മനസ്സിനെ സ്നേഹിക്കാൻ പഠിച്ചിരിക്കുന്നു. ഭൂതകാലത്തിന്റെ മുറിവുകളെ ഓർത്തുവെച്ച് വിലാപങ്ങൾ സൃഷ്ടിക്കാതെ, "ഞാൻ എനിക്കായി ജീവിക്കുന്നു" എന്ന് ഉറക്കെ പ്രഖ്യാപിക്കുന്നിടത്താണ് കഥയിലെ പോസിറ്റീവ് തരംഗം ആരംഭിക്കുന്നത്.

​കഥയിലെ പ്രണയവും പിന്നീട് അതുണ്ടാക്കുന്ന മാറ്റങ്ങളും തികച്ചും യാഥാർത്ഥ്യബോധത്തോടെയാണ് അവതരിപ്പിച്ചിരിക്കുന്നത്. മുൻകാമുകനായ ബ്രീസുമായുള്ള കണ്ടുമുട്ടൽ ഒരു വൈകാരിക കൊടുങ്കാറ്റാകാമായിരുന്നിട്ടും, കൃഷ്ണ അതിനെ വളരെ ശാന്തതയോടെയും പക്വതയോടെയും നേരിടുന്നു. തളർത്താൻ ശ്രമിച്ചവരുടെ മുന്നിൽ തളരാതെ, നിന്ദിച്ചവർക്ക് മുന്നിൽ സ്വന്തം അധ്വാനം കൊണ്ട് ഉയർന്നുവന്ന കൃഷ്ണ ഇന്ന് ഫീനിക്സ് കോഫി പൗഡറിന്റെ എം.ഡി എന്ന വിജയിച്ച സ്ത്രീയാണ്.

​കഥയിലെ ഏറ്റവും മനോഹരമായ വരികളിൽ ഒന്ന്, "40 കഴിഞ്ഞ ഒരു സ്ത്രീ വിലയിടേണ്ടത് അവളെ ആര് സ്നേഹിക്കുന്നു എന്നതിലല്ല, സ്വയം എത്രമാത്രം സ്നേഹിക്കപ്പെടുന്നു എന്നതിലാണ്" എന്ന തിരിച്ചറിവാണ്.

 മറ്റുള്ളവരുടെ അനുകമ്പയ്ക്കോ സഹതാപത്തിനോ വേണ്ടി യാചിക്കാതെ സ്വന്തം കാലിൽ നിൽക്കാനും, തനിക്ക് ചുറ്റും തണൽ വിരിക്കാനും അവൾ പഠിച്ചു കഴിഞ്ഞു.
​ചിത്രകാരനായ ക്രിസ്റ്റിയുടെ വരകളും, കോഫി ഷോപ്പിലെ അന്തരീക്ഷവും, പുറത്ത് പെയ്യുന്ന മഴയുമെല്ലാം കഥയുടെ അന്തരീക്ഷത്തെ കൂടുതൽ സാന്ദ്രമാക്കുന്നു. വരുംകാലത്തിലേക്ക് ആത്മവിശ്വാസത്തോടെയും നിശ്ചയദാർഢ്യത്തോടെയും കാൽവെപ്പുകൾ നടത്തുന്ന കൃഷ്ണ, തോറ്റുകൊടുക്കാൻ മനസ്സില്ലാത്ത ഏതൊരു സ്ത്രീയുടെയും പ്രതിനിധിയാണ്.

​നഷ്ടപ്പെട്ട പ്രണയത്തെക്കുറിച്ചോ സംഭവങ്ങളെക്കുറിച്ചോ ഓർത്ത് ദുഃഖിച്ചിരിക്കാതെ, സ്വന്തം ജീവിതം സ്വയം പടുത്തുയർത്താൻ ആഗ്രഹിക്കുന്ന ഏതൊരാൾക്കും പ്രചോദനം നൽകുന്ന തികച്ചും പോസിറ്റീവായ ഒരു കഥയാണ് 'മഴവരകൾ
ആശംസകൾ
- കെ എ സോളമൻ
31.8.2026

Monday, 31 August 2026

കാറ്റ്- കഥ



#കറുങ്കഥ
#കാറ്റ് 
വെളിയിടത്ത് ഇറങ്ങി നിൽക്കുക അയാളുടെ ശീലമായിരുന്നു. ഒരിക്കൽ  അയാൾക്ക് മനസ്സിലായി, വെളിയിടത്തെ കാറ്റാണ് കാറ്റ്.!
- കെ എ സോളമൻ

ബാഹ്യമായ ലളിതവൽക്കരണത്തിന് അപ്പുറം ആഴത്തിലുള്ള തത്ത്വചിന്താപരമായ തലങ്ങൾ ഈ കഥയ്ക്കുണ്ട്.
​ ഇവിടെ പരാമർശിച്ചത്  അതിരുകളില്ലാത്ത സ്വാതന്ത്ര്യമെന്ന കാറ്റിനെക്കുറിച്ചാണ്

​അടച്ചിട്ട മുറികളും നാലുചുവരുകളും മനുഷ്യന് നൽകുന്നത് താത്കാലികമായ സുരക്ഷിതത്വം മാത്രമാണ്. എന്നാൽ മനുഷ്യന്റെ ആത്മാവ് എപ്പോഴും കൊതിക്കുന്നത് അതിരുകളില്ലാത്ത വിസ്തൃതിയെയാണ്. ഈ കഥയിലെ "അയാൾ" ആധുനിക മനുഷ്യന്റെ പ്രതീകമാണ്, വെളിയിടത്തിൽ അദ്ദേഹത്തെ കാണാം .

​വെളിയിടം എന്നതു ഒരു പ്രതീകം മാത്രം

സമൂഹം നിർമ്മിച്ചു വെച്ചിരിക്കുന്ന ചട്ടക്കൂടുകൾ, കുടുംബം, മുൻവിധികളുടെ നാലുചുവരുകൾ എന്നിവയിൽ നിന്നെല്ലാം പുറത്തുകടക്കുന്ന അവസ്ഥയാണ് "വെളിയിടം". സ്വന്തം കംഫർട്ട് സോണിൽ നിന്ന് പുറത്തുവരാൻ തയ്യാറാകുന്ന ഒരു വ്യക്തിക്കു മാത്രമേ സത്യത്തെയും സ്വാതന്ത്ര്യത്തെയും പൂർണ്ണമായി അനുഭവിക്കാൻ കഴിയൂ. അത്തരം വെളിയിടങ്ങളിലേക്ക് ഇറങ്ങിനിൽക്കുക എന്നത് അയാളുടെ പതിവ് ശീലമായിരുന്നു എന്നതിലൂടെ, അയാൾ ഉള്ളുകൊണ്ട് എപ്പോഴും സത്യസന്ധമായ സ്വാതന്ത്ര്യം തിരയുന്ന ആളാണെന്ന് വ്യക്തമാകുന്നു.

​"വെളിയിടത്തെ കാറ്റാണ് കാറ്റ്":
ചുവരുകൾക്കുള്ളിലെ വിശറിയുടെ കാറ്റോ, ഫാനിന്റെ കാറ്റോ അല്ല യഥാർത്ഥ കാറ്റ്. അത് കൃത്രിമവും പരിമിതവുമാണ്. എന്നാൽ വെളിയിടങ്ങളിലെ കാറ്റ് പ്രകൃതിയുടേതാണ്; അതിന് തടസ്സങ്ങളില്ല, അതിരുകളില്ല. ആ കാറ്റ് ശരീരത്തെ മാത്രമല്ല, മനസ്സിനെയും വിതാനങ്ങളെയും ഉണർത്തുന്ന ഒന്നാണ്. 

ജീവിതത്തിലെ യഥാർത്ഥ സത്യവും ആനന്ദവും അനുഭവിക്കണമെങ്കിൽ, നാം നിർമ്മിച്ചു വെച്ചിരിക്കുന്ന സ്വാർത്ഥമായ അതിരുകൾക്ക് പുറത്തുകടക്കണമെന്ന് അയാൾ തിരിച്ചറിയുന്ന നിമിഷമാണിത്.

"ഒരിക്കൽ അയാൾക്ക് മനസ്സിലായി..." എന്ന പ്രയോഗം കഥയിലെ ഒരു വലിയ വഴിത്തിരിവാണ് (Epiphany). അത് കേവലം അന്തരീക്ഷത്തിലെ കാറ്റിനെക്കുറിച്ചുള്ള തിരിച്ചറിവല്ല, മറിച്ച് ജീവിതത്തിന്റെ പരമമായ സത്യത്തെക്കുറിച്ചുള്ള അറിവാണ്. കുറഞ്ഞ വാക്കുകൾ കൊണ്ട് വായനക്കാരനിൽ വലിയൊരു ചിന്താതരംഗം ഇതു സൃഷ്ടിക്കും എന്നു തന്നെയാണ് പ്രതീക്ഷ.
​🤣🤣🤣🤣

Monday, 24 August 2026

അക്ഷരങ്ങളുടെ ഉപാസകൻ

#അക്ഷരങ്ങളുടെ #ഉപാസകൻ, 
#ഗൗതവൻ_തുറവൂർ_സാർ_80ൻ്റെ_നിറവിൽ
​കൊച്ചി മുതൽ അമ്പലപ്പുഴ വരെയുള്ള സാംസ്കാരിക വേദികളിലെ സജീവ സാന്നിധ്യവും, ആയിരക്കണക്കിന് കുഞ്ഞുങ്ങൾക്ക് അറിവിന്റെ വെളിച്ചം പകരുകയും ചെയ്ത പ്രിയപ്പെട്ട അധ്യാപകനും കവിയുമായ ശ്രീ. ഗൗതമൻ തുറവൂർ സാർ എൺപതിന്റെ നിറവിലേക്ക്  തന്റെ അശീതി പൂർത്തിയിലേക്ക് ചുവടുവെക്കുന്ന ധന്യനിമിഷമാണ് നാളെ (22.06.2026), 

ഗൗതമൻ സാർ തന്റെ ജീവിതത്തിന്റെ എൺപത്തിയൊന്നാം വസന്തത്തിലേക്ക് പ്രവേശിക്കുമ്പോൾ, ആ സ്നേഹധന്യമായ സാന്നിധ്യത്തെ ആദരവോടെ ഓർക്കുകയാണ് അദ്ദേഹത്തിൻറെ ശിഷ്യരും സുഹൃത്തുക്കളും. ​കേവലം ഒരു ജന്മദിനത്തിനപ്പുറം, ഒരു മനുഷ്യൻ തന്റെ ആയുസ്സും ആരോഗ്യവും ചിന്തകളും സമൂഹത്തിനുവേണ്ടിയും അക്ഷരങ്ങൾക്കുവേണ്ടിയും എങ്ങനെ മാറ്റിവെച്ചു എന്നതിന്റെ സാക്ഷ്യപത്രമാണ് ഗൗതമൻ സാറിന്റെ ഈ എൺപതാം ജന്മദിനം.
​
​ഏതാണ്ട് കാൽനൂറ്റാണ്ട് മുമ്പ്, ചേർത്തലയിലെ  'സംസ്കാര' എന്ന സാംസ്കാരിക സംഘടനയുടെ വേദിയിൽ വെച്ചാണ് ഞാൻ അദ്ദേഹത്തെ ആദ്യമായി പരിചയപ്പെടുന്നത്. അക്കാലത്ത് പി. വി. പി. ഒറ്റമശ്ശേരി പ്രസിഡന്റായും, വെട്ടക്കൽ മജീദ് സെക്രട്ടറിയായും നയിച്ചിരുന്ന ആ സദസ്സ് പ്രതിഭകളുടെ ഒരു വലിയ സംഗമഭൂമിയായിരുന്നു.

​ഗാനരചയിതാവ് പൂച്ചാക്കൽ ഷാഹുൽ, ശക്തീശ്വരം പണിക്കർ, മാരാരിക്കുളം വിജയൻ, ഖാലിദ് പുന്നപ്ര, പി. കെ. തങ്കപ്പൻ സാർ, വൈരം വിശ്വൻ, മത്തായി സാർ, കൊക്കേതമംഗലം എ. വി. നായർ, ഓമന തിരുവിഴ, വി. കെ. സുപ്രൻ , ഉല്ലല ബാബു തുടങ്ങി നിരവധി പ്രതിഭകൾ ഒത്തുചേർന്നിരുന്ന ഒരു സുവർണ്ണകാലമായിരുന്നു അത്.
​അന്ന് ആ സംഘടനയുടെ സാരഥികളിൽ ഒരാളായിരുന്ന ഗൗതമൻ സാർ, ഇന്നും  'സംസ്കാര'യുടെ പ്രതിമാസ പരിപാടികളിൽ പങ്കെടുക്കുന്നുവെന്ന് ഞാൻ കരുതുന്നു

.
​കവിതകൾ എഴുതുക മാത്രമല്ല, അവ തനതായ ആലാപന ശൈലിയിലൂടെ ശ്രോതാക്കളുടെ ഹൃദയത്തിലേക്ക് നേരിട്ട് എത്തിക്കാനുള്ള അദ്ദേഹത്തിന്റെ സവിശേഷമായ കഴിവ് ഏതൊരു സാഹിത്യ സദസ്സിനെയും ധന്യമാക്കുന്ന ഒന്നാണ്.
​
​എല്ലാവരോടും അളവറ്റ സ്നേഹത്തോടും വാത്സല്യത്തോടും കൂടി പെരുമാറുക എന്നത് ഗൗതമൻ സാറിന്റെ സഹജമായ സ്വഭാവ വൈശിഷ്ട്യമാണ്. എങ്കിൽപ്പോലും, അധ്യാപക സമൂഹത്തെ ചെറുതാക്കി കാണിക്കുന്ന ഏതൊരു പ്രവണതയ്ക്കും എതിരെ  ഗർജ്ജിക്കുന്ന ഒരു വിപ്ലവകാരിയും അദ്ദേഹത്തിലുണ്ട്.

​"ഇന്നത്തെ അധ്യാപകർക്ക് കാര്യമായ വിവരമില്ല" എന്ന് ഏതെങ്കിലും പൊതുവേദിയിൽ ആരെങ്കിലും പറഞ്ഞാൽ, സാറിന്റെ രക്തം തിളയ്ക്കും. അധ്യാപകന്റെ അന്തസ്സിനെ ചോദ്യം ചെയ്യുന്നവരോട് അദ്ദേഹം വിട്ടുവീഴ്ചയില്ലാതെ പോരാടും, യുദ്ധം പ്രഖ്യാപിക്കും. എന്നാൽ ഒരു യഥാർത്ഥ ഗുരുവര്യന്റെ മനസ്സുള്ളതുകൊണ്ട് തന്നെ, ആ ദേഷ്യം അദ്ദേഹം ക്ഷണനേരം കൊണ്ട് മറക്കുകയും ചെയ്യും. ഒരു സഹപ്രവർത്തകൻ അല്ലെങ്കിൽ അധ്യാപകൻ എന്ന നിലയിൽ എനിക്ക് അദ്ദേഹത്തിന്റെ ഈ സ്വഭാവത്തോട് എപ്പോഴും അനുഭാവം മാത്രമേ തോന്നിയിട്ടുള്ളൂ.

​"എല്ലാവരുടെയും മിത്രം ആരുടെയും മിത്രമല്ല" എന്നൊരുചൊല്ലുണ്ട്.. എന്നാൽ ഗൗതമൻ സാറിന്റെ കാര്യത്തിൽ ഈ ചൊല്ല് പൂർണ്ണമായും ശരിയല്ല എന്ന്പറയേണ്ടിവരും. അദ്ദേഹം ഭേദചിന്തകളില്ലാതെ എല്ലാവരുടെയും യഥാർത്ഥ മിത്രമാണ്. ആ ഹൃദയത്തിൽ എല്ലാവർക്കും സ്ഥാനമുണ്ട്, എല്ലാവരോടും ഒരേ സ്നേഹവുമുണ്ട്.

​ആയിരക്കണക്കിന് വരികളിൽ കവിതയെഴുതി ആത്മാവിനെ തൊട്ടുണർത്തിയ കവി, ആയിരക്കണക്കിന് കുട്ടികളെ നല്ല നാളെയുടെ പൗരന്മാരാക്കി മാറ്റിയ ശ്രേഷ്ഠനായ ഗുരുനാഥൻ... അശീതിയുടെ നിറവിൽ നിൽക്കുന്ന പ്രിയപ്പെട്ട ഗൗതമൻ തുറവൂർ സാറിന് ആയുസ്സും ആരോഗ്യവും നിറഞ്ഞ ദീർഘായുസ്സ് നേരുന്നു. ഇനിയും ഒരുപാട് വസന്തങ്ങൾ സാറിന് അക്ഷരവഴിയിൽ തുടരാൻ കഴിയട്ടെ.

​ഗൗനവൻ സാറിന് ഹൃദയം നിറഞ്ഞ അശീതി മംഗളങ്ങൾ! 
ആശംസകൾ സാർ!💚💜💙
-കെ എ സോളമൻ 
ജൂൺ 21, 2026

Thursday, 20 August 2026

രാഗാർദ്രം- ഗാനം

#രാഗർദ്രം! 

​നീയാം താളവും
നീയാകും പ്രഭാതവും
സ്വപ്നത്തിൻ ഞാൻ കണ്ടു
എൻ നിദ്രയിൽ വന്നു നീയും

​മാഞ്ഞൊരീ സന്ധ്യയിൽ
ഓർമ്മകൾ നിറയവേ,
ശ്രുതിമീട്ടുമാ പ്രണയ ഭാവം
എൻ ഹൃദയത്തിലലിഞ്ഞുചേർന്നു.

​നിഴലായി നീ എൻ കൂടെ
തുണയാണെന്നറിയാതെ
കുളിർ കാറ്റിൻ സംഗീതത്തിൽ 
അകലെയാണെന്ന തോന്നൽ

വീണ്ടും ഞാൻ പാടട്ടെ
പ്രണയമേ  നിന്നരുകിൽ
​നീയാണെൻ സ്വപ്നസ്വരം
നീയാണെൻ സൗഭാഗ്യം

നീയാം താളവും
നീയാകും പ്രഭാതവും
സ്വപ്നത്തിൻ ഞാൻ കണ്ടു
എൻ നിദ്രയിൽ വന്നു നീയും.
NB
വരികൾ വളരെ മനോഹരവും ഭാവനിർഭരവുമായിട്ടാണ് ഞാൻ കാണുന്നത്.! പ്രണയത്തിന്റെ ആഴവും പ്രഭാതം പോലെ പ്രകാശപൂർണ്ണമായ സാന്നിധ്യവും വളരെ ലളിതമായ വാക്കുകളിൽ  കോറിയിട്ടിരിക്കുന്നു.

വയലാർ ഇങ്ങനെ എഴുതുമോ എന്നൊന്നും ചോദിക്കുന്നില്ല. പ്ലാറ്റിനം ജൂബിലി പിന്നിട്ടവർക്കും അവുലോസുണ്ട അറുക്കപ്പൊടി മോഡലിൽ പൊടിച്ച് വായിലിട്ടൂയലാട്ടുന്നവർക്കും ഒരു നോസ്റ്റാൾജിക് ഫീൽ ഈ ഗാനം സമ്മാനിക്കും എന്നാണ്  വിശ്വാസം. ആണിനും പെണ്ണിനും പാടാം. ഏതെങ്കിലും അക്ഷരം വായിൽ കൊള്ളാത്തതായി തോന്നുന്നുവെങ്കിൽ ആ അക്ഷരം വേണ്ടെന്നുവയ്ക്കുക

അതുകൊണ്ട്, ആരും കേൾക്കാനില്ലാത്ത മട്ടിൽ പാടുക, ആസ്വദിക്കുക, 
ഹാപ്പി ഓണം !
- കെ എ സോളമൻ💜💜💜

Monday, 17 August 2026

ഓണം വരവായി- ഓണപ്പാട്ട്

ഓണം വരവായി
ഓണപ്പാട്ട് - കെ എ സോളമൻ

ഓണം വരവായോടിപ്പോരൂ പൂത്തുമ്പികളേ,
നാടും വീടും മാവേലി വാഴുന്നിടമാകട്ടെ
​മഞ്ഞവെയിൽ തുളസിക്കതിരിൽ പൊന്നുതൂകുന്നു,
മുറ്റത്തെത്തും പൂക്കളത്തിൽ ചിരികൾ വിരിയുന്നു.

​അത്തപ്പൂവും തുമ്പപ്പൂവും ഒന്നുചേരുമ്പോൾ,
കുട്ടിപ്പട തൻ തുള്ളിക്കളി കാണാനഴകാണ്.
​മാഞ്ചോട്ടിലെ തണലിലിരുന്നു ഊഞ്ഞാലാടാം,
ഓണക്കോടി ഉടുത്തുനടക്കും കുഞ്ഞുങ്ങളിതാ.

​സദ്യയിലൊരു നാടൻ രുചിയുടെ താളമുണരുന്നു,
പായസത്തിൻ മധുരത്താലേ മനസ്സ് നിറയുന്നു.
​സ്നേഹം പൂക്കും പുലരിയിലിന്നു നാടൊന്നാകെ,
നാട്ടുരുചിയും സന്തോഷവും ഒന്നായ് വാഴുന്നു.

ഓണം വരവായോടിപ്പോരൂ പൂത്തുമ്പികളേ,
നാടും വീടും മാവേലി വാഴുന്നിടമാകട്ടെ

Saturday, 15 August 2026

പൂവിളി - ഓണപ്പാട്ട്

#പൂവിളി- ഓണപ്പാട്ട്
അത്തം പിറന്നു കഴിഞ്ഞാൽ
ചിത്തം കുളിർക്കുമെല്ലാർക്കും
നാടും നഗരവും താനേ
ഓണത്തിൻ ഈണത്തിൽ മുങ്ങും.

​പൂവിളിക്കൊപ്പം ഉണരും
മുറ്റത്തു പൂക്കള പൂവിളിമേളം
തുമ്പയും തെച്ചിയും ചേർത്ത്
ചിങ്ങത്തിൻ ഭംഗി വിരിയും.

​ചോതി വിശാഖമൊഴിഞ്ഞ്
ഉത്രാടപ്പച്ച പടരും,
ഉച്ചയ്ക്കു കൂടിയിരുന്ന്
ഓണസദ്യയുമങ്ങനെ ഉണ്ണും.

ഓണപ്പുലരിതൻ നാളിൽ
പുത്തൻ കോടിയുടുത്തു മകിഴും,
മാവേലി തമ്പുരാനെന്റെ
വീടിൻ മുന്നിലങ്ങെത്തും
- കെ എ സോളമൻ

Friday, 14 August 2026

മഞ്ഞപ്പൂക്കൾ - ഓണപ്പാട്ട്

മഞ്ഞപ്പൂക്കൾ-ഓണപ്പാട്ട്
പൊന്നോണത്തിൻ വരവറിയിച്ച്
പൂക്കളമഞ്ചലിലേറ്റുമ്പോൾ,
തമ്പുരാന്റെ വിളി കേട്ടങ്ങു
അറബിക്കടലല തല്ലുമ്പോൾ.

​പൊന്നുരുകും വെയിലേറ്റു നടക്കും
മാവേലിയുടെ രഥമെത്തി,
മന്നവന്റെ കാൽപ്പാടുകളിൽ
മഞ്ഞപ്പൂക്കൾ ചിരിച്ചാർത്തു.

​കള്ളവുമില്ലാ ചതിയുമില്ലാ
പഴയൊരു കാലം ഓർമ്മയിലിന്നും,
മാനവരാകെ ഒന്നായ് വാഴും
സുന്ദരതീരം കൺമുന്നിൽ.

​ഓണത്തുമ്പികളാടും നേരം
വയലും കുളവും കുളിരണിയും,
നാടൊട്ടുക്കും ആഹ്‌ളാദത്തിൻ
പാട്ടുകൾ പാടിപ്പതിയുന്നു.
- കെ എ സോളമൻ

Tuesday, 11 August 2026

കറുത്തവാവ് -കവിത

#കർക്കിടകവാവ്
കർക്കിടകക്കറുത്തവാവിൻ
നിശബ്ദമാം പുലരി വന്നു,
പിതൃക്കൾതൻ സ്മരണയിൽ കണ്ണീർ-
ത്തിരയായ് തീരങ്ങളാകെ

എള്ളും ജലവും പൂവുമായി
മക്കൾ വന്നണയുന്നു തീരേ,
ബലിപ്പുല്ലു കൈയിലേന്തി
തർപ്പണം നൽകുന്നു ഭക്തിയോടെ.

ആലുവാമണൽത്തട്ടിലെത്തി
തിരുനെല്ലിക്കാടിൻ മടിയിൽ,
തിരുവല്ലം കടൽത്തീരത്തും
വർക്കലയിലും വാവുനാളിൽ,

പിതൃക്കൾക്കായ് പ്രാർത്ഥനയോടെ
നൽകുമീ തിലതർപ്പണങ്ങൾ,
മോക്ഷമായ് ശാന്തിയായ് മാറി
അനുഗ്രഹമായ് കറുത്തവാവ്.
-കെ എ സോളമൻ

Saturday, 8 August 2026

10 ഫ്ളാഷ് ഫിക്ഷൻ

ലോകത്തിലെ ഏറ്റവും ചെറിയ,
ശക്തമായ 10 കുറുങ്കഥകൾ (Very Short Stories/Flash Fiction)

1 ) വില്പനയ്ക്ക്

​"വില്പനയ്ക്ക്: കുഞ്ഞുഷൂസുകൾ , ഒരിക്കലും ഉപയോഗിക്കാത്തവ."
(ഏണസ്റ്റ് ഹെമിംഗ്‌വേ)

For sale: baby shoes, never worn."
​Context & Origin
​This famous six-word story is often attributed to Ernest Hemingway, who reportedly won a $10 bet by writing a complete story in just six words. However, while Hemingway championed extreme brevity in prose, there is no solid proof he authored it—similar classified ads and micro-stories had appeared in newspapers as early as 1906.

2) ​കാലസഞ്ചാരം (Time Travel)
​"ലോകത്തിലെ അവസാനത്തെ മനുഷ്യൻ മുറിയിൽ ഒറ്റയ്ക്കിരിക്കുകയായിരുന്നു. പെട്ടെന്നാണ് വാതിലിൽ ആരോ മുട്ടിയത്."
(ഫ്രെഡ്രിക് ബ്രൗൺ)

3) ​സ്നേഹം
​"അവൾ അവന്റെ കൈകൾ മുറുകെ പിടിച്ചു. അവന് കാഴ്ചയില്ലായിരുന്നു, അവൾക്ക് സംസാരിക്കാനും കഴിയില്ലായിരുന്നു. എങ്കിലും അവർ എല്ലാം സംസാരിച്ചു."

4) ​വേർപിരിയൽ
​"അവർ പത്തുവർഷത്തിനുശേഷം വീണ്ടും കണ്ടുമുട്ടി. 'സുഖമാണോ?' എന്ന് ചോദിച്ചു. രണ്ടുപേരുടെയും കണ്ണുകളിൽ ഒരേ ചോദ്യമായിരുന്നു: 'നമുക്കെന്താണ് സംഭവിച്ചത്?'"

5) ​പ്രതീക്ഷ
​"വിത്തു വിതച്ച കർഷകൻ വറ്റിവരണ്ട ആകാശത്തേക്ക് നോക്കി. വിയർപ്പു തുള്ളി മണ്ണിൽ വീണപ്പോൾ മഴപെയ്യാൻ തുടങ്ങി."

6) ​ഒരു ഫോൺ കോൾ
​"തെറ്റായ നമ്പറിലേക്ക് വന്ന ആ ഫോൺ കോളാണ് എന്റെ ജീവിതത്തിലെ ഏറ്റവും വലിയ സത്യം എന്നോട് പറഞ്ഞത്."

7) ​മറവി (Alzheimer's)
​"അയാൾ ദിവസവും അവൾക്ക് പ്രണയലേഖനങ്ങൾ എഴുതി. ഇന്ന് ആദ്യമായി അവൾ ചോദിച്ചു, 'ആരാണ് നിങ്ങൾ?'"

8) ​ഭയം
​ആമസോൺ കാട്ടിലൂടെ പാതിരാത്രിയിൽ ഒരു ട്രെയിൻ ചീറി പാഞ്ഞു പോകുകയാണ്. അടുത്തിരിക്കുന്ന ആളും താനും  മാത്രംകമ്പാർട്ട്മെന്റിനുള്ളിൽ. അയാൾ ചോദിച്ചു "താങ്കൾക്ക് പ്രേതത്തിൽ വിശ്വാസം ഉണ്ടോ?"
തിരിഞ്ഞു നോക്കിയതും അയാളെ കണ്ടില്ല

9) ​ത്യാഗം
​"അമ്മ തന്റെ  പാത്രത്തിലെലെ അവസാനത്തെ വറ്റും കുട്ടിക്ക് നൽകി എന്നിട്ടുപറഞ്ഞു, 'എനിക്ക് വയറു നിറഞ്ഞു, ഇനി വേണ്ട.'"

10)​മരണം
​"അയാൾ ഒരു പുതിയ ഡയറി വാങ്ങി ആദ്യ പേജിൽ എഴുതി: 'നാളെ മുതൽ പുതിയൊരു തുടക്കം.' പക്ഷേ, ആ രാത്രി അവസാനത്തേതായിരുന്നു."

11) കാറ്റ്
വെളിയിടത്ത് ഇറങ്ങി നിൽക്കുക അയാളുടെ ശീലമായിരുന്നു. ഒരിക്കൽ അയാൾ മനസ്സിലാക്കി വെളിയിടത്തെ കാറ്റാണ് കാറ്റ്

12) പ്രതീക്ഷ
അവർ എല്ലാവരും കൃത്യസമയത്ത് തന്നെ ഒത്തുകൂടി, സന്തോഷത്തോടെ പ്രതീക്ഷയോടെ. അത് ഒരു വൃദ്ധയോഗം ആയിരുന്നു

തുമ്പപ്പൂ ചിരി

#തുമ്പപ്പൂചിരി
മഞ്ഞപ്പട്ട് ഞൊറിഞ്ഞുടത്ത്
മഞ്ഞക്കുറി പൊട്ടും തൊട്ട്
മുക്കുറ്റിപ്പൂ മുടിയിൽ ചൂടി
മൊഞ്ചത്തി പ്പെണ്ണൊരുത്തി...

​തങ്കക്കൊലുസ് കൊഞ്ചിടുമ്പോൾ
തുമ്പപ്പൂവിൻ ചിരിയൊഴുക്കി
ആറ്റുവഞ്ചിച്ചോലയിലൂടെ
മെല്ലെ മെല്ലെ വരുന്ന നേരം...

​പൊൻവെയിലിൽ കുളിച്ചുമെല്ലെ 
പച്ചവയൽ ആടിടുമ്പോൾ
ഇളംകാറ്റിൻ കുളിരലയിൽ
നവുമണം പരന്നിടുമ്പോൾ...

​കണ്ണിൽ കവിത ഈരടിയായ്
കൈയ്യിൽ കിങ്ങിണിവളയുമേന്തി
ഗ്രാമശ്രീയിൻ മടിത്തട്ടിലവൾ
പൊന്നഴകായി തിളങ്ങിടുന്നു
-കെ എ സോളമൻ

Thursday, 30 July 2026

നിങ്ങൾ തെറ്റുകൾ ചെയ്തോ ?

#ആയകാലത്ത്_നിങ്ങൾ_തെറ്റുകൾ_ചെയ്തോ?
ആയകാലത്ത് നിങ്ങൾ ചെയ്തത് അപരാധമല്ല, ആ കാലഘട്ടത്തിൽ നിങ്ങളുടെ  അറിവുവെച്ച് എടുത്ത ഏറ്റവും മികച്ച തീരുമാനമായിരുന്നു എന്നു ചിന്തിക്കുക . 

ഇന്നത്തെ നിങ്ങളുടെ 'ശരികൾ' അന്നത്തെ നിങ്ങളുടെ 'തെറ്റുകളിൽ' നിന്ന് ഉണ്ടായതാണ്. അതിനാൽ, പഴയ കാര്യങ്ങളെ വെറുക്കുന്നതിന് പകരം, പുതിയവ രൂപപ്പെടുത്താൻ പറ്റുമെങ്കിൽ അത് ചെയ്യുക. അനുഭവങ്ങൾക്ക്, അവ എന്തുതന്നെയായാലും,  നന്ദി പറയുക.

​അന്നത്തെ ആ തീരുമാനങ്ങളാണ് നിങ്ങളെ ഇന്നത്തെ ഈ നിലയിൽ എത്തിച്ചത്. അത് അന്നത്തെ അതിജീവനത്തിന്  അത്യാവശ്യമായിരുന്നിരിക്കാം. കാലത്തിനനുസരിച്ച് ചിന്താഗതികൾ മാറുന്നു, അത്രേയുള്ളു. 

അന്ന് ചെയ്തത് തെറ്റായിപ്പോയി" എന്ന് ഇന്ന് നിങ്ങൾക്ക് തോന്നുന്നുണ്ടെങ്കിൽ, അതിനർത്ഥം നിങ്ങൾ ഒരുപാട് മെച്ചപ്പെട്ടു എന്നാണ്.
​കുറ്റബോധം വേണ്ട: കഴിഞ്ഞുപോയ കാലത്തെ ഇന്നത്തെ നിലവെച്ച് വിലയിരുത്തുന്നത് നീതിയല്ല. 

​അന്നത്തെ ആ അപരാധങ്ങൾ അല്ലെങ്കിൽ ആവശ്യങ്ങൾ ആണ് ഇന്നത്തെ നിങ്ങളുടെ വിവേകത്തിന്റെ വിത്തുകൾ. അതുകൊണ്ടു സ്വയം ആശ്വാസം കൊള്ളുക .💜💚💙
💕 കെ എ സോളമൻ

ഒരു തുള്ളി വീശിയാൽ- കവിത

#ഒരുതുള്ളി #വീശിയാൽ
​പറ്റിയ തെറ്റൊന്നുമാലോചിച്ചിപ്പോൾ
പറ്റുന്നില്ലെനിക്കൊന്നു നിൽക്കുവാൻ പോലുമേ!
കിഴവന്മാരെല്ലാം കൂടിടും സംഘത്തിൽ
കുഴയാതെ വന്നാൽ രസമില്ലെനിക്കൊട്ടും.

​കാലിത്തിരി ഇടറുന്നുണ്ടെ ങ്കിലുമെൻ്റെ
കരളിൻ്റെയുള്ളിൽ കുളിരാണ് പൊന്നെ.
"ഇവനെന്തീ പ്രായത്തിൽ 
കാട്ടുന്നതെന്നോർത്തു"
ചിരിയടക്കീക്കെണ്ടു, നോക്കുന്നോ മാന്യന്മാർ?

​പഞ്ചാരയും പിന്നെ ബി.പിയു മെന്നോർത്ത് 
ദുഖിപ്പോർക്കറിയില്ല കള്ളിന്റെ പോഷകം
ആടിയാടി പിന്നെ ചാടിയും പോകുമ്പോൾ
ആകാശവുമെന്നെ പുണരുന്നതു പോലെ!

​കുറ്റങ്ങൾ ചൊല്ലുവാൻ നിൽക്കേണ്ട കൂട്ടരേ
ഊർദ്ധ്വൻ  വലിക്കുമ്പോൾ ആമോദം വേണ്ടയോ?!
ഒരു തുള്ളി വീശിയാൽ പോയിടും വാർദ്ധക്യം,
പ്രായത്തെ  വീണ്ടും പതിനെട്ടിൽ കെട്ടീടാം
-കെ എ സോളമൻ

NB
നാടൻപാട്ടുകളിൽ കാണുന്ന 'താളം തുള്ളി' പാടുന്ന രീതിയിൽ ഇത് അവതരിപ്പിക്കുക. കാലിടറി ആടിയാടി നടക്കുന്നതുപോലെയുള്ള ഒരു വരിവെയ്പ്പ് ഈ താളത്തിന് ഇണങ്ങും.

Wednesday, 8 July 2026

മറന്നുവോ നിങ്ങൾ ? കവിത

#മറന്നുവോ #നിങ്ങൾ?
​നിങ്ങൾ മറന്നതായിരിക്കാം
ആ ഹൃദയമിങ്ങനെ നിങ്ങൾക്കായ്‌
കാത്തു കാത്തിരിക്കയാണെന്ന്.

​അല്ല നിങ്ങൾ എന്നേ മറന്നു
ആ ഒരാളുടെ സ്വപ്നങ്ങളിൽ
നിങ്ങളെന്ന പ്രകാശത്തെ
നിറച്ചു വച്ച രാവുകൾ പലതും.

​നിങ്ങൾക്കായ്‌ മിടിച്ചതോ..
നിങ്ങളുടെ മൗനത്തിൽ നീറിയതോ..
നിങ്ങളെന്ന ഒരേയൊരു തീരത്ത്
മാത്രം അണയുന്നതോ..
നിങ്ങളാൽ മാത്രം നോവുന്നതോ..
നിങ്ങളെ മാത്രം ജീവന്റെ
വഴിയായി അടയാളപ്പെടുത്തുന്നതോ..
അങ്ങനെ ഒന്നും തന്നെ
നിങ്ങളറിയണമെന്നില്ല.

​ഒരിക്കൽപോലും
ആ സ്നേഹമറിയാൻ
നിങ്ങൾക്കാവില്ലെങ്കിൽകൂടിയും
കൂടെ നിങ്ങളില്ലാതെ
ആ ഹൃദയമേയില്ലെന്ന്
എങ്ങനെ ബോധ്യപ്പെടുത്താനാണ്..!

​എത്ര നീലാകാശം മാഞ്ഞുപോയാലും
എത്ര ശിശിരങ്ങൾ വന്നു മറഞ്ഞാലും
എത്രയെത്ര കാലങ്ങൾ
കടന്നു പോയാലും
നിങ്ങളെന്ന ഓർമയിൽ മാത്രമല്ലേ
ആ ഒരാളിപ്പൊഴും
ശ്വാസം തൊട്ടറിഞ്ഞു ജീവിക്കുന്നത്.
ശ്വാസം തൊട്ടറിഞ്ഞു ജീവിക്കുന്നത്

കെ എ സോളമൻ

Tuesday, 7 July 2026

ഏറ്റവും ചെറിയ കഥ

For sale: baby shoes, never worn." (വിൽപ്പനയ്ക്ക്, ഒരിക്കലും ധരിക്കാത്ത കുഞ്ഞുഷൂസുകൾ) എന്ന ലോകപ്രശസ്തമായ ഈ ആറു വാക്കുകൾ മാത്രമുള്ള കഥ ഏണസ്റ്റ് ഹെമിങ്വേ (Ernest Hemingway) എഴുതിയതാണെന്നാണ് പൊതുവെ കരുതപ്പെടുന്നത്.
​തൻ്റെ സുഹൃത്തുക്കളുമായി വെച്ച ഒരു ബെറ്റിൻ്റെ (പന്തയം) ഭാഗമായാണ് അദ്ദേഹം ഇത്രയും ചെറിയൊരു കഥ എഴുതിയതെന്നാണ് കഥ. വെറും ആറ് വാക്കുകൾ കൊണ്ട് വായനക്കാരെ കരയിപ്പിക്കാൻ കഴിയുമോ എന്നതായിരുന്നു ആ വെല്ലുവിളി. ഹെമിങ്വേ ഒരു ടിഷ്യൂ പേപ്പറിൽ ഈ വരികൾ എഴുതി അവരെ കാണിച്ചുവെന്നും പന്തയം ജയിച്ചുവെന്നുമാണ് പറയപ്പെടുന്നത്. (എന്നാൽ പിൽക്കാല ചരിത്രകാരന്മാർ ഇതിൻ്റെ യഥാർത്ഥ സ്രഷ്ടാവ് ഹെമിങ്വേ തന്നെയാണോ എന്നതിൽ ചില സംശയങ്ങൾ പ്രകടിപ്പിച്ചിട്ടുണ്ട്).
​ഈ കഥയുടെ ഹൃദയസ്പർശിയായ വ്യാഖ്യാനം
​ഈ കഥയിൽ ഒളിച്ചിരിക്കുന്നത് വാക്കുകളേക്കാൾ വലിയൊരു നിശ്ശബ്ദതയാണ്. ആറ് വാക്കുകൾ കൊണ്ട് ഒരു വലിയ മനുഷ്യജീവിതത്തിൻ്റെ ദുരന്തമാണ് എഴുത്തുകാരൻ വരച്ചിടുന്നത്.
​പ്രതീക്ഷകളുടെ തകർച്ച: ഒരു കുഞ്ഞ് ജനിക്കാൻ പോകുന്നു എന്നറിഞ്ഞപ്പോൾ ആ അച്ഛനും അമ്മയും എത്രമാത്രം സന്തോഷിച്ചിട്ടുണ്ടാകും! അവർ ജനിക്കാനിരിക്കുന്ന തങ്ങളുടെ ജീവൻ്റെ കഷ്ണത്തിനായി സ്നേഹത്തോടെ വാങ്ങിക്കൂട്ടിയതാണ് ആ കുഞ്ഞുഷൂസുകൾ. കുഞ്ഞിൻ്റെ ആദ്യ ചുവടുകൾ അവർ സ്വപ്നം കണ്ടിട്ടുണ്ടാകാം.
​പറയാത്ത ആ വലിയ നഷ്ടം: "ഒരിക്കലും ഉപയോഗിച്ചിട്ടില്ല" (Never worn) എന്ന രണ്ട് വാക്കുകളിലാണ് ഈ കഥയുടെ ആത്മാവ് കിടക്കുന്നത്. ആ ഷൂസുകൾ ധരിക്കാൻ ആ കുഞ്ഞ് ജീവനോടെ ഉണ്ടായിരുന്നില്ല. ഒന്നുകിൽ പ്രസവത്തിൽ അല്ലെങ്കിൽ അതിന് മുൻപ് തന്നെ ആ കുഞ്ഞ് ഈ ലോകത്തോട് വിടപറഞ്ഞു.
​ദാരിദ്ര്യവും നിസ്സഹായാവസ്ഥയും: കുഞ്ഞ് നഷ്ടപ്പെട്ടതിൻ്റെ ആഴത്തിലുള്ള വേദനയിൽ കഴിയുമ്പോഴും, അവർക്ക് ആ ഷൂസുകൾ വിൽക്കേണ്ടി വരുന്നു. ഒരുപക്ഷേ ഹോസ്പിറ്റൽ ബില്ലുകൾ അടയ്ക്കാനോ, അല്ലെങ്കിൽ തങ്ങളുടെ കുഞ്ഞിൻ്റെ ഓർമ്മകൾ കൺമുന്നിൽ കാണുമ്പോഴുണ്ടാകുന്ന നെഞ്ചുപൊട്ടുന്ന വേദന സഹിക്കാൻ കഴിയാത്തതുകൊണ്ടോ ആകാം അവരത് വിൽക്കാൻ പരസ്യം നൽകിയത്.
​ആരും കടന്നുചെല്ലാൻ ഭയക്കുന്ന ഒരു ശ്മശാനത്തിൻ്റെ മൂകതയുണ്ട് ഈ പരസ്യത്തിന്. വരികൾക്കിടയിലൂടെ വായനക്കാരൻ്റെ മനസ്സിലേക്ക് പെയ്തിറങ്ങുന്നത് ഒരു അമ്മയുടെയും അച്ഛൻ്റെയും കണ്ണീരാണ്.

ഏറ്റവും ചെറിയ കഥ

For sale: baby shoes, never worn." (വിൽപ്പനയ്ക്ക്, ഒരിക്കലും ധരിക്കാത്ത കുഞ്ഞുഷൂസുകൾ) എന്ന ലോകപ്രശസ്തമായ ഈ ആറു വാക്കുകൾ മാത്രമുള്ള കഥ ഏണസ്റ്റ് ഹെമിങ്വേ (Ernest Hemingway) എഴുതിയതാണെന്നാണ് പൊതുവെ കരുതപ്പെടുന്നത്.
​തൻ്റെ സുഹൃത്തുക്കളുമായി വെച്ച ഒരു ബെറ്റിൻ്റെ (പന്തയം) ഭാഗമായാണ് അദ്ദേഹം ഇത്രയും ചെറിയൊരു കഥ എഴുതിയതെന്നാണ് കഥ. വെറും ആറ് വാക്കുകൾ കൊണ്ട് വായനക്കാരെ കരയിപ്പിക്കാൻ കഴിയുമോ എന്നതായിരുന്നു ആ വെല്ലുവിളി. ഹെമിങ്വേ ഒരു ടിഷ്യൂ പേപ്പറിൽ ഈ വരികൾ എഴുതി അവരെ കാണിച്ചുവെന്നും പന്തയം ജയിച്ചുവെന്നുമാണ് പറയപ്പെടുന്നത്. (എന്നാൽ പിൽക്കാല ചരിത്രകാരന്മാർ ഇതിൻ്റെ യഥാർത്ഥ സ്രഷ്ടാവ് ഹെമിങ്വേ തന്നെയാണോ എന്നതിൽ ചില സംശയങ്ങൾ പ്രകടിപ്പിച്ചിട്ടുണ്ട്).
​ഈ കഥയുടെ ഹൃദയസ്പർശിയായ വ്യാഖ്യാനം
​ഈ കഥയിൽ ഒളിച്ചിരിക്കുന്നത് വാക്കുകളേക്കാൾ വലിയൊരു നിശ്ശബ്ദതയാണ്. ആറ് വാക്കുകൾ കൊണ്ട് ഒരു വലിയ മനുഷ്യജീവിതത്തിൻ്റെ ദുരന്തമാണ് എഴുത്തുകാരൻ വരച്ചിടുന്നത്.
​പ്രതീക്ഷകളുടെ തകർച്ച: ഒരു കുഞ്ഞ് ജനിക്കാൻ പോകുന്നു എന്നറിഞ്ഞപ്പോൾ ആ അച്ഛനും അമ്മയും എത്രമാത്രം സന്തോഷിച്ചിട്ടുണ്ടാകും! അവർ ജനിക്കാനിരിക്കുന്ന തങ്ങളുടെ ജീവൻ്റെ കഷ്ണത്തിനായി സ്നേഹത്തോടെ വാങ്ങിക്കൂട്ടിയതാണ് ആ കുഞ്ഞുഷൂസുകൾ. കുഞ്ഞിൻ്റെ ആദ്യ ചുവടുകൾ അവർ സ്വപ്നം കണ്ടിട്ടുണ്ടാകാം.
​പറയാത്ത ആ വലിയ നഷ്ടം: "ഒരിക്കലും ഉപയോഗിച്ചിട്ടില്ല" (Never worn) എന്ന രണ്ട് വാക്കുകളിലാണ് ഈ കഥയുടെ ആത്മാവ് കിടക്കുന്നത്. ആ ഷൂസുകൾ ധരിക്കാൻ ആ കുഞ്ഞ് ജീവനോടെ ഉണ്ടായിരുന്നില്ല. ഒന്നുകിൽ പ്രസവത്തിൽ അല്ലെങ്കിൽ അതിന് മുൻപ് തന്നെ ആ കുഞ്ഞ് ഈ ലോകത്തോട് വിടപറഞ്ഞു.
​ദാരിദ്ര്യവും നിസ്സഹായാവസ്ഥയും: കുഞ്ഞ് നഷ്ടപ്പെട്ടതിൻ്റെ ആഴത്തിലുള്ള വേദനയിൽ കഴിയുമ്പോഴും, അവർക്ക് ആ ഷൂസുകൾ വിൽക്കേണ്ടി വരുന്നു. ഒരുപക്ഷേ ഹോസ്പിറ്റൽ ബില്ലുകൾ അടയ്ക്കാനോ, അല്ലെങ്കിൽ തങ്ങളുടെ കുഞ്ഞിൻ്റെ ഓർമ്മകൾ കൺമുന്നിൽ കാണുമ്പോഴുണ്ടാകുന്ന നെഞ്ചുപൊട്ടുന്ന വേദന സഹിക്കാൻ കഴിയാത്തതുകൊണ്ടോ ആകാം അവരത് വിൽക്കാൻ പരസ്യം നൽകിയത്.
​ആരും കടന്നുചെല്ലാൻ ഭയക്കുന്ന ഒരു ശ്മശാനത്തിൻ്റെ മൂകതയുണ്ട് ഈ പരസ്യത്തിന്. വരികൾക്കിടയിലൂടെ വായനക്കാരൻ്റെ മനസ്സിലേക്ക് പെയ്തിറങ്ങുന്നത് ഒരു അമ്മയുടെയും അച്ഛൻ്റെയും കണ്ണീരാണ്.

Sunday, 5 July 2026

അധ്യാപകന്റെ ഉപദേശം -കഥ (റിപോസ്റ്റ്)

#അദ്ധ്യാപകൻ്റെ ഉപദേശം - കഥ
ഇക്കാലയളവിൽ ഒത്തിരി മുഖങ്ങൾ കണ്മുന്നിലൂടെ കടന്ന് പോയിട്ടുണ്ട്, കൂടുതലും വിദ്യാർത്ഥികളായി. ഇവരെയൊക്കെ ഉപദേശിക്കുക എന്നത് പണ്ടത്തെ ഒരു രീതിയായിരുന്നു. ഉപദേശം മൂലംഎത്ര വിദ്യാർത്ഥികൾ നേരെയായി എന്നതിൽ ആരുമായും തർക്കത്തിനില്ല

പക്ഷേ നിലവിൽ ആരെയും അങ്ങനെ ഉപദേശിക്കാറില്ല.  ഫിസിക്സ്  മാത്രം പഠിപ്പിക്കും. പഠിക്കേണ്ടവർ പഠിക്കുമെന്നു വിശ്വാസം. 

എന്തുകൊണ്ട് ഇപ്പോൾ ഇങ്ങനെ എന്ന് ചോദിച്ചാൽ, ഉപദേശം കൊണ്ട് കാര്യമായ നേട്ടം ഉണ്ടാക്കാനായില്ല എന്നതു തന്നെ കാരണം. മാത്രമല്ല, ദൈവഭക്തി, ഗുരുഭക്തി, പിതൃഭക്തി, മാതൃഭക്തി ഇവയൊക്കെ വേണമെന്ന് വിചാരിച്ചാൽ അതു കാലഘട്ടത്തിന് യോജിച്ചതല്ലെങ്കിലോ യെന്ന തോന്നലും

 വിശക്കുന്നവന്റെ മുമ്പിൽ വിളമ്പിക്കിട്ടിയ ആഹാരം കാണുമ്പോൾ "ദൈവമേ നന്ദി" യെന്നു മനസ്സിൽ ധ്യാനിച്ചാൽ അതാണ് ഏറ്റവും വലിയ പ്രാർത്ഥന. 

പക്ഷേ പ്രാർത്ഥനയെ പാടില്ല എന്ന് ആരെങ്കിലും പറഞ്ഞാൽ ?

പഠിപ്പിച്ചു വിട്ടവർ സർക്കാർ ഉദ്യോഗവും മറ്റു ഉദ്യോഗവും കഴിഞ്ഞ്  റിട്ടയർ ചെയ്തുകൊണ്ടിരിക്കുന്ന കാലം. ഇക്കാര്യം പരിഗണിക്കാതെ ഇപ്പോഴും പഠിപ്പിച്ചു കൊണ്ടിരിക്കുന്നതിനാൽ ചില കുട്ടികൾ അവരുടെ വിവാഹത്തിനു ക്ഷണിക്കും, ജോലി കിട്ടുമ്പോൾ അറിയിക്കും. 

വിവാഹത്തിന് ക്ഷണിക്കുമ്പോൾ പങ്കെടുക്കാൻ പറ്റുകയാണെങ്കിൽ പങ്കെടുക്കും. അധ്യാപകൻ ആയതുകൊണ്ട് പ്രത്യേക ഗിഫ്റ്റ് ഒന്നും കരുതേണ്ടതില്ല, ഒരു ഗ്രൂപ്പ് ഫോട്ടോയ്ക്ക് മുഖം കാണിച്ചതിനു ശേഷം സദ്യയും കഴിഞ്ഞ് സന്തോഷത്തോടെ മടങ്ങാം. ദൂരെയുള്ള വിവാഹങ്ങൾ ആണെങ്കിൽ ആശംസകൾ മതിയാകും
ഇമെയിൽ, ഫേസ്ബുക്ക്, വാട്സ്ആപ്പ് ഒക്കെ ഉള്ളതിനാൽ ആശംസകൾ അയക്കുന്നത ഇന്ന് വളരെ എളുപ്പമാണ്.

കഴിഞ്ഞ ദിവസമാണ് ശ്രീലക്ഷ്മിഎന്നെ വിളിച്ചത്. ആ കുട്ടിക്ക് ഇൻഫോപാർക്കിലെ ഒരു ഐടി കമ്പനിയിൽ ജോലി കിട്ടി സാറിൻറെ അനുഗ്രഹം വേണം. അനുഗ്രഹം വാട്സാപ്പിലൂടെ നൽകിയെങ്കിലും  പ്രത്യേകിച്ച് ഉപദേശം ഒന്നും കൊടുത്തില്ല.

പക്ഷെ ജോലി കിട്ടിയ വിവരം അറിയിക്കാൻ  ശിവപ്രസാദ്  എന്നെ വിളിച്ചപ്പോൾ എനിക്ക് ഉപദേശം കൊടുക്കാതിരിക്കാൻ കഴിഞ്ഞില്ല. അത് എന്തുകൊണ്ടാണെന്ന് വെച്ചാൽ, കേരള സർക്കാരിൻറെ അറിയപ്പെടുന്ന ഒരു കമ്പനിയിലാണ് ജോലി കിട്ടിയത്. പ്രസ്തുത കമ്പനിയിൽ ജോലി ചെയ്യുന്ന ശിവപ്രസാദ് എന്ന് പേരുകാരായ മറ്റുള്ളവർക്ക് ഭാവിയിൽ ഒരു പ്രശ്നം ഉണ്ടാകാതിരിക്കാൻ കമ്പനിയുടെ പേര് ഞാൻ റിസർവ് ചെയ്യുകയാണ്.

ഞാൻ ശിവപ്രസാദിനെ ഉപദേശിച്ചു. ഒത്തിരി നാളുകൾക്ക് ശേഷം  കൊടുക്കുന്ന ഒരു ഉപദേശം

" ശിവപ്രസാദിൻ്റെ ഓഫീസ് ജനസമ്പർക്കം കൂടുതലുള്ള ഒരു ഓഫീസ് ആണെന്ന് അറിയാമല്ലോ? യുവാക്കളും യുവതികളും പ്രായമുള്ളവരും ഒക്കെ ഓരോരോ ആവശ്യത്തിനായി വരും. അവരോടെല്ലാം സ്നേഹത്തോടെ, സൗമ്യമായി പെരുമാറണം. ആദ്യമൊക്കെ നമ്മൾ സ്നേഹത്തോടെ പെരുമാറിയാലും ജോലിയിലെ ക്ലേശം മൂലം മുരടിപ്പു ബാധിക്കാം ചിലപ്പോൾ സ്നേഹത്തോടെ പെരുമാറാൻ  മറന്നുപോയേക്കാം. ഇത് ഒരിക്കലും ഉണ്ടാകാൻ പാടില്ല  വരുന്ന ആളുകളുടെ മുഖത്ത് നോക്കി സ്നേഹത്തോടെ സംസാരിക്കണം. അവരുടെ ആവശ്യങ്ങൾ ചോദിച്ച് മനസ്സിലാക്കി ചെയ്തു കൊടുക്കാൻ സാധിക്കുന്നതാണെങ്കിൽ ഉടനെ തന്നെ ചെയ്തു കൊടുക്കണം  മറ്റൊരു അവസരത്തിലേക്ക് മാറ്റി വയ്ക്കരുത്. കൂടുതൽ സമയം ആളുകളെ നിർത്തി വിഷമിപ്പിക്കുകയും ചെയ്യരുത്, പ്രത്യേകിച്ച് യുവതികളെയും പെൺകുട്ടികളെയും "

"അതെ സർ അങ്ങനെ തന്നെയായിരിക്കും" ശിവപ്രസാദ്

ശിവപ്രസാദ് കറ തീർന്ന ഒരു ഫുട്ബോൾ പ്രേമിയാണ്. അദ്ദേഹത്തിൻറെ ആൽബത്തിൽ എല്ലാം ലോകപ്രശസ്ത ഫുട്ബോൾ താരങ്ങളുടെ ഫോട്ടോയാണ്. പക്ഷേ വനിത ഫുട്ബോൾ താരങ്ങളുടെ ഫോട്ടോ ഒരെണ്ണം പോലും ഇല്ല

 ശിവപ്രസാദ് അല്ലാതെ മറ്റൊരാളാണ് വിളിച്ചിരുന്നതെങ്കിൽ ഇത്തരം ഒരു ഉപദേശം ഞാൻ  നൽകില്ലായിരുന്നു. അതിനു കാരണമുണ്ട്, പുരാണങ്ങളിലെ ശ്രീഹനുമാനുമായി ബന്ധപ്പെട്ടതാണത്

രാമായണത്തിൽ  ദൃഢഭക്തിയുടെ ഉത്തമോദാഹരണമായാണല്ലോ ശ്രീഹനുമാൻ അറിയപ്പെടുന്നത്.  ആഞ്ജനേയ സ്വാമി എന്നും വിളിക്കും. കോടിക്കണക്കിന് ഭക്തരാൽ ആരാധിക്കപ്പെടുന്ന ആഞ്ജനേയ സ്വാമി തന്റെ ബുദ്ധിശക്തികൊണ്ടും, ശ്രീരാമഭക്തി കൊണ്ടും ഹിന്ദു വിശ്വാസത്തിൽ പ്രധാനപ്പെട്ടൊരു ദേവനാണ് . രാമനാമം ജപിക്കുന്നിടത്തു ഹനുമൽ സാന്നിധ്യം ഉണ്ടാകുമെന്നും, നവഗ്രഹദോഷങ്ങൾ പ്രത്യേകിച്ച് ശനിദോഷം ഹനുമൽ ഭക്തരെ ബാധിക്കില്ലെന്നുമാണ് വിശ്വാസം.

ഒരാൾ ആഞ്ജനേയ സ്വാമിയെ സാധന ചെയ്യുകയാണെങ്കിൽ ബ്രഹ്മചര്യം പിന്തുടരുന്നത് പ്രധാനമാണ്. സ്ത്രീകളോടു അധികം ഇടപെടാതെ  പൊതുവെ അകറ്റി നിർത്തുകയും വേണം. കൂടാതെ മദ്യം, മത്സ്യ - മാംസാദി, പുകയില എന്നിവ ഉപയോഗിക്കാനും പാടില്ല . ആഞ്ജനേയ സ്വാമിക്ക്  ഇത്തരം കാര്യങ്ങൾ ഇഷ്ടമല്ല എന്നതാണ് വിശ്വാസം.

അപ്പോൾ എന്തുകൊണ്ടാണ് ഞാൻ അങ്ങനെ ഉപദേശിച്ചത്?

ശിവപ്രസാദ് കറതീർന്ന ആഞ്ജനേയ  ഭക്തനാണ്.
-കെ എ സോളമൻ
                      *  *  *