Thursday, 11 March 2021

ഒരു കോവീഡിയൻ അപാരത - കഥ

ഒരു കോവീഡിയൻ അപാരത - കഥ

ഏതു യാത്രയുടെ ഒടുവിലാണ് ഇവിടെ വന്നതെന്ന് ഓർമ്മയില്ല. തിരക്കൊഴിഞ്ഞ സ്ഥലമായ ഒരു വലിയപള്ളിയുടെ അകം. ഒറ്റതിരിഞ്ഞു ആളുകൾ പള്ളിക്കകത്തും പുറത്തും നടക്കുന്നു  ഉച്ചതിരിഞ്ഞ നേരമായതുകൊണ്ടാവണം പള്ളിയിൽ പ്രാർത്ഥനയൊന്നുമില്ല. വല്ലാത്ത ക്ഷീണം. ഭക്ഷണമാണെങ്കിൽ കഴിച്ചിട്ടുമില്ല.
അടുത്തു കണ്ട ബഞ്ചിൽ ഇരുന്നു..കൈയ്യിലുള്ളത്  8 മൂലയുള്ള പഴയ മോഡൽ റെക്സിൻ ബാഗ്. അതിനകത്തു കാര്യമായിട്ടൊന്നുമില്ല. പഴ്സ് പാൻ്റ്സിൻ്റെ ഇടത്തേ പോക്കറ്റിലാണ് . കൈ തടവി പഴ്സ് ഉറപ്പാക്കുന്ന ശീലം എപ്പോഴോ തുടങ്ങിയതാണ്. പാൻ്റ്സിൻ്റെ വലത്തേ പോക്കറ്റിൽ ടൗവലും ചീപ്പും

ക്ഷീണം കൊണ്ടാവണം ബഞ്ചിലിരുന്ന ഉടൻ മയങ്ങിപ്പോയി. ബാഗ് ബഞ്ചിൻ്റെ ഒരറ്റത്തേക്ക് യാന്ത്രികമായി തളളി വെച്ചതിനു ശേഷം അതിൽ തല അമർത്തി ഉറങ്ങി.

എത്ര നേരം അങ്ങനെ ഉറങ്ങി എന്നറിയില്ല കടും നീല ഉടുപ്പും ഉടുപ്പിൽ ഏതോ സ്റ്റിക്കറും പതിച്ച 3 പേർ വന്ന് എന്നെ ബഞ്ചിൽ നിന്ന് പിടിച്ചെഴുൽപ്പിച്ചു.

അവർ സൗമ്യമായി സംസാരിച്ചു തുടങ്ങി
"ഞങ്ങൾ കോവിഡ് ആർമിയുടെ അംഗങ്ങളാണ്. താങ്കൾ ഈ സമയത്ത് ഉറങ്ങുന്നത് കോവിഡ് മൂലമാണോയെന്ന് സംശയിക്കുന്നു. കൂടുതൽ തുമ്മുന്നതും ചുമക്കുന്നതുമായ ആളുകളെയും ഞങ്ങൾ കണ്ടെത്താറുണ്ട് . പുറത്ത് ഹെൽത്ത് ഡിപ്പാർട്ട്മെൻ്റിൻ്റെ മൊബൈൽ യൂണിറ്റ് കിടപ്പുണ്ട്. താങ്കൾ ഞങ്ങളോടൊപ്പം അവിടെ വരെ വന്നു കോവിഡ് ടെസ്റ്റിനു വിധേയനാവണം. ആൻ്റിജൻ ടെസ്റ്റോ, ആർ സി പി ആർ ടെസ് റ്റോ ഏതു വേണമെങ്കിലും താങ്കൾക്ക് തിരഞ്ഞെടുക്കാം. എല്ലാം സൗജന്യമാണ് "

ഇന്ത്യൻ ആർമി, പി.ജെ. ആർമി എന്നൊക്കെ കേട്ടിട്ടുള്ളതല്ലാതെ കോവിഡ് ആർമി എന്ന് കേൾക്കുന്നത് ആദ്യമാണ്.

സൗമ്യമായി സംസാരിച്ച അവരോടു ഞാൻ സൗമ്യമായി തിരികെ ചോദിച്ചു.
" ഇപ്പോൾ ടെസ്റ്റു നടത്താൻ താല്പര്യമില്ലെങ്കിലോ?"

" അതു താങ്കളുടെ ഇഷ്ടം. പക്ഷെ ഇവിടെ ഇങ്ങനെ കിടക്കാൻ പറ്റില്ല "

ഞാൻ ബാഗുമെടുത്തു പുറത്തേയ്ക്കിറങ്ങി. ഇടതു പോക്കറ്റിൽ തടവി  പഴ്സ് ഉറപ്പാക്കിയ ശേഷം പോക്കറ്റിൽ കൈയ്യിട്ടു പഴ്സ് പുറത്തെടുത്തു തുറന്നു നോക്കി . 20-ൻ്റെ 3 നോട്ടുകൾ. ഇന്ത്യൻ കറൻസി നോട്ടുകളിൽ ഏറ്റവും ഭംഗിയുള്ളത് എന്ന് ആരോ പറഞ്ഞതുകൊണ്ടാണ് 20-ൻ്റെ നോട്ടുകൾ പഴ്സിൽ അവശേഷിച്ചത്ത്. അതായത് 60 രൂപയുണ്ട്, പിന്നെ ഏതാനും ചില്ലറത്തുട്ടുകളും എന്തായാലും ഊണു കഴിച്ചിട്ടു തന്നെ കാര്യം.

40 രുപ, 50 രൂപ. 99 രൂപ എന്നിങ്ങനെ വിവിധ നിരക്കിൽ ഊണുകൾ വിൽക്കുന്നതിൻ്റെ ബോർഡുകൾ അവിടവടെ കാണാം. 40 ൻ്റെ ഊണുകഴിക്കാമെന്നുറച്ചു.

അപ്പോഴാണ് മാസ്ക്  ധരിച്ചിച്ചിട്ടില്ലയെന്ന കാര്യം ശ്രദ്ധയിൽ പെട്ടത്. ബാഗിൽ കൈയ്യിട്ടു മാസ്ക് തിരഞ്ഞെങ്കിലും കിട്ടിയില്ല. അത് എവിടയോ വെച്ചു നഷ്ടപ്പെട്ടു. ഒരു പക്ഷെ കിടന്നുറങ്ങിയ സ്ഥലത്തു വെച്ചായിരിക്കും. തിരികെ പോയി എടുക്കാനൊന്നും പറ്റില്ല, കോവിഡ് ആർമി!

കൈയ്യിലുള്ള ടൗവൽ ഉപയോഗിച്ച് വായും മൂക്കും മൂടിക്കെട്ടാമെന്ന് നോക്കിയപ്പോൾ അതിനു നീളവും പോരാ.

അടുത്തു കണ്ട കടയിൽ കയറിൽ ഒരു മാസ് കു വാങ്ങാമെന്ന് കരുതി. മാസ്ക് നിർമ്മാണവും കച്ചവടവും വൻ വ്യവസായമായ കാലത്ത് മാസ്ക് ലഭ്യമല്ലാത്ത കടകളില്ല.

അടുത്തു കണ്ട റെഡിമെയ്ഡ് ഷോപ്പിലാണ് കയറിയത്. വില്പനയ്ക്കുള്ള ധാരാളം വസ്ത്രങ്ങൾ തൂക്കിയിട്ടുണ്ട് എങ്കിലും വില്പപനക്കാരെ ആരെയും അവിടെകണ്ടില്ല.

"ഇവിടാരുമില്ലേ?"  എൻ്റെ ചോദ്യം കേട്ട് മൂന്ന് യുവതികളുടെ തലകൾ ഒരു കാബിനിൽ നിന്നു ഒന്നിച്ചു പൊങ്ങി വരുന്നതു കണ്ടു. സുന്ദരികളായ അവർ മൂവരും ഊണുകഴിക്കയായിരുന്നു

അവരിലെ മുതിർന്ന ഒരുത്തി എന്നോടു ചോദിച്ചു
"എന്താ വേണ്ടത് "
"ഒരു മാസ്ക് "
" അതിനു താമസമുണ്ട്. ഉണ്ടായിരുന്നത് തീർന്നു, അപ്പുറത്തു തയ്ക്കുന്നുണ്ട് "

" മാസ്ക് തയ്ക്കുകയോ?"

" അതെ, ഇവിടെ മാസ്ക് തയ്ച്ചാണ് കൊടുക്കുന്നത്, പുറത്തു നിന്നു വരുന്ന മസ്കുകൾ എങ്ങനെ വിശ്വസിക്കും, അവ കൊറോണ പരത്തുന്നതാണെങ്കിലോ? അത്യാവശ്യമാണെങ്കിൽ എൻ്റെ മാസ്കു തരാം"

"ഛേ " ഞാൻ പുറത്തേയ്ക്കു നടന്നു. എനിക്കു സംശയം തോന്നി, ആ യുവതി കളിയാക്കിയതാണോ? എയ്  അങ്ങനെ ആവാൻ  തരമില്ല. അവരുടെ മുഖഭാവം അങ്ങനെ അല്ലായിരുന്നു. അതു മാത്രമല്ല, ഛെ എന്നു പറഞ്ഞതു തെറ്റായിപ്പോയെന്നു എനിക്കു തോന്നി. ചുണ്ടിൽ ചെഞ്ചായം പൂശീ റ്റി വി സ്ക്രീനിൽ വന്ന് കാമുക ഹൃദയങ്ങളെ ത്രസിപ്പിക്കുന്ന യുവതിയെപ്പോലുള്ള ആ യുവതിയോടു അങ്ങനെ പ്രതികരിക്കരുതായിരുന്നു. 

കടയിൽ നിന്ന് പുറത്തേയ്ക്ക് ഇറങ്ങിയപ്പോൾ മൈക്കിൽ അനൗൺസ് ചെയ്യുന്നതു കേട്ടു. 

" വരൂ കടന്നു വരൂ, രാജ്യത്തെ 138 കോടി 94 ലക്ഷം ജനങ്ങളിൽ 119 കോടിയും കോവിഡ്വാക്സിൻ സ്വീകരിച്ചു കഴിഞ്ഞു. നിങ്ങൾ എന്താ മടിച്ചു നില്ക്കുന്നത്. കടന്നു വരു, ഈ കരവാനിലേക്ക് . കോ വിഡ് വാക്സിൻ ഫ്രീ . ഒരു രേഖയും വേണ്ട നിങ്ങളുടെ വിരൽ തുമ്പു മാത്രംമതി - അതിലുണ്ട് എല്ലാം രേഖകളും "

ഓഹോ, എങ്കിൽ പിന്നെ വാക്സിൻ എടുത്തിട്ട് 40 രൂപയുടെ ഊണുകഴിക്കാം..ഇന്ത്യൻ ജനസംഖ്യ ഇത്ര കൃത്യമായി വേറെയാരും പറയുന്നതു ഞാൻ കേട്ടിട്ടില്ല.  ഞാൻ കരവാനി ലേക്ക് നടന്നു.

സ്വീകരിക്കാൻ വാതിൽ പടിക്കൽ സ്റ്റിക്കറൊട്ടിച്ച നേവിബ്ളൂ കോട്ടിട്ട ഒരു സുന്ദരി.  രണ്ടു കസേരയുള്ളതിൽ ഒന്നിൽ ഒരാൾ കോവിഡ് വാക്സിൻ എടുത്തു കൊണ്ടരിക്കുന്നു.

അകത്തു പ്രവേശിച്ച എന്നോടു അവിടെ ഇരുന്ന യുവതി:
"സേറിൻ്റെ ഫിംഗർ കാണിക്കൂ . സോറി ഒരു കാര്യം പറയാൻ വിട്ടു. ഇവിടെ കോവിഡ് വാക്സിൻ എടുക്കുന്നതിന് ഖാദി ബോർഡ് തയ്യാറാക്കിയ പ്രത്യേകതരം ഷർട്ടുണ്ട്. ഇടത്തേ ത്തോളിൽ രണ്ടു ദ്വാരം വെട്ടിയ ഷർട്ട്. ഒരു ദ്വാരം ആദ്യ ഡോസ് ഇൻജക്ഷനും രണ്ടാമത്തേത് ബൂസ്റ്റർ ഡോസിനും. സേർ വിഷമി,ക്കാനില്ല. ഷർട്ട് ഇവിടെ കിട്ടും, 340 രൂപാ. ഖാദി ബോർഡിൻ്റേതായതു കൊണ്ടാണ് ഇത്ര വില കുറച്ചു നല്കുന്നത് "

ഞാൻ ഇടത്തേ പോക്കറ്റിൽ തടവി. 40 രൂപയുടെ ഊണ് !.

ഞാൻ പറഞ്ഞു " ഞാൻ പോയിട്ടു പിന്നെ വന്നാൽ മതിയോ "

" അത് സേറിൻ്റെ ഇഷ്ടം. ഇപ്പോഴാണെങ്കിൽ തിരക്കു കുറവായിരുന്നു "

എൻ്റെ നിസ്സാഹയത അവരെ പറഞ്ഞു ബോധ്യപ്പെടുത്താൻ നില്ക്കാതെ ഞാൻ കരവാനിൽ നിന്ന് പുറത്തു കടന്നു.

എൻ്റെ പ്രിയപ്പെട്ട സൂസന്ന മരിയ വന്ന് ചെവിയിൽ ഒച്ച വെച്ചില്ലായിരുന്നെങ്കിൽ ഈ കോവീഡിയൻ സ്വപ്നം അനന്തമായി നീണ്ടു പോകുമായിരുന്നു

-കെ എ സോളമൻ

#മഞ്ഞിൻകണങ്ങൾ


ഒരു ശൈത്യത്തിലായിരുന്നു നമ്മളാദ്യമായി കണ്ടത്
ഏതോ ദേശാടനപ്പക്ഷികൾ വിരുന്നെത്തിയ കാലം
നമ്മളറിഞ്ഞു:

ഒരു മഴക്കാറും പെയ്യാതെ പോയില്ല
ഒരു മരവും തണൽ വിരിക്കാതിരുന്നില്ല
ഒരു കിളിയും പാടാതിരുന്നില്ല
ഒരു പുഴയും ഒഴുകാതിരുന്നില്ല
ഒരിക്കലും സൂര്യനുദിക്കാതിരുന്നില്ല

നമുക്ക് മൂന്നാറിൻ കുന്നിലെ തണുപ്പിലേക്കു പോകാം
ചെടികളും പൂക്കളും കണ്ടുരസിക്കാം
തണുത്ത കാറ്റിനുള്ളിലേക്കു നടക്കാം
അപരിചിതരുടെ കൈകളിലെ
മഞ്ഞിൻ കണങ്ങളായി തെറിക്കാം
- കെ എ സോളമൻ

Saturday, 30 January 2021

എനിക്കറിയില്ല - കവിത


എനിക്കറിയില്ല, എന്താണ് പറയേണ്ടതെന്ന്
എനിക്കറിയില്ല,  എന്താണ് കാണേണ്ടതെന്ന്
എനിക്കറിയില്ല, എന്താണ് ചെയ്യേണ്ടതെന്ന്
സ്വപ്നത്തിലല്ല ഞാൻ, നിശ്ചയം

സ്വപ്നത്തിലല്ലെന്നതിന് എന്താണ് തെളിവ്?
രാജകുമാരൻ്റെ മേലങ്കിയില്ല
കൂടെ നടക്കുവാൻ കാവൽക്കാരില്ല
ശരത്കാല വസതിയും കളികളുമില്ല,
ചെങ്കോലിനായുള്ള മോഹവുമില്ല.

ഒരിക്കൽ ഞാൻ കണ്ട സ്വപ്നങ്ങളിലെല്ലാം
മഴയും നിലാവും സ്വന്തമായി തോന്നി
ഇന്നിതാ സൂര്യനും ചന്ദ്രനും താരകളും
പലജാതി മനുഷ്യർ പങ്കിട്ടെടുത്തു.

എനിക്കറിയില്ല, എന്താണ് പറയേണ്ടതെന്ന്
എനിക്കറിയില്ല,  എന്താണ് കാണേണ്ടതെന്ന്

കെ എ സോളമൻ

Tuesday, 19 January 2021

ഒരു_പ്രീഡിഗ്രി_അപാരത

#ഒരു_പ്രീഡിഗ്രി_അപാരത

ഞാൻ നിങ്ങളുടെ ഫിസിക്സ് അധ്യാപകൻ. ഇന്നു നിങ്ങളുടെ ഫിസിക്സ് ക്ളാസ് ആരംഭിക്കുകയാണ്. ഇക്കൊല്ലം മൂന്നധ്യാപകരാണ് ഓരോ ആഴ്ചയിലും നിങ്ങളെ ഫിസിക് സ്  പഠിപ്പിക്കാൻ വരുന്നത്. അടുത്ത കൊല്ലവും മൂന്നു പേർ. പക്ഷെ രണ്ടു കൊല്ലവും ഞാൻ ഉണ്ടായിരിക്കും, മറ്റു രണ്ടു പേരും മാറാം. ഞാൻ നിങ്ങളുടെ പ്രാക്ടിക്കൽ ചാർജുള്ള അധ്യാപകനാണ് , അതാണ് കാരണം

എന്താണ് പ്രാക്ടിക്കൽ ചാർജ് എന്ന് നിങ്ങളിൽ ചിലർക്കു സംശയമുണ്ടാകാം. അതു വഴിയേ മാറിക്കോളും

ആഴ്ചയിൽ ആകെ 25 മണിക്കൂറാണ് ക്ളാസ് . ഫിസിക്സിൻ്റെ 3 ക്ളാസ് ഒഴിവാക്കിയാൽ ബാക്കി വിഷയങ്ങൾക്ക് 22 ക്ളാസ്.  പത്തിരുപതു അധ്യാപകരെങ്കിലും നിങ്ങളെ പഠിപ്പിക്കാനെത്തും. ഓരോരുത്തരുടെയും മുഖമോർത്തു വെച്ചാൽ നിങ്ങൾക്ക് കൊള്ളാം, കാരണംഅവർ പഠിപ്പിക്കന്നത് എന്താണെന്ന് ഓരോ ക്ളാസിലും വന്ന് നിങ്ങളോടു പറയണമെന്നില്ല, അതനുഭവമാണ് 

ഇത്തരമൊരു കൺഫ്യൂഷൻ ഒഴിവാക്കാൻ വേണ്ടിയാണ് എന്തു വിഷയമാണ്  ഞാൻ പഠിപ്പിക്കുന്നതെന്ന് ആദ്യമേ പറഞ്ഞത്. അടുത്ത മൂന്നാലു കളിസിലും വിഷയം എന്തെന്ന് ഓർമ്മിപ്പിക്കും അല്ലെങ്കിൽ നിങ്ങളിൽ ചിലർ കരുതും ഇതു മ്യൂസിക്‌ സാറാണെന്ന്.

ഒരോ മണിക്കൂർ വെച്ചളള ക്ളാസാണെന്ന് ഞാൻ പറഞ്ഞു കഴിഞ്ഞു. ദിവസവും അഞ്ചു മണിക്കൂർ. ഉച്ചയ്ക്ക് ഒരു മണിക്കൂർ ലഞ്ച് ബ്റേക്ക്. ഓരോ അവറിന് ശേഷവും 5 മിനിട്ട് ഇൻ്റർവെൽ.

ക്ളാസിൽ നോട്ട്സ് തരണമെന്ന നിബന്ധന ഇല്ല. വേണമെങ്കിൽ തരാം എന്നതാണ് നിലവിലെ രീതി.  ഞാൻ എന്തായാലും നോട്സ് തരുന്നുണ്ട്, പക്ഷെ ഒരു വ്യവസ്ഥ

തരുന്ന നോട്സ് ഒരു 200 പേജിൻ്റെ വരയിടാത്ത നോട്ടുബുക്കിൽ എഴുതണം. ബുക്ക് എല്ലാ ക്ളാസിലും കൊണ്ടുവരണം. നോട്സ് റഫ് ബുക്കിൽ എഴുതി പിന്നീട് നോട്ടുബുക്കിൽ പകർത്താം എന്ന കണ്ടീഷൻ സ്വീകാര്യമല്ല, കാരണം നിങ്ങളൊക്കെ വലിയ തിരക്കുള്ള ആളുകളാണ്. ബുക്കു ചിലപ്പോഴെക്കെ ഞാൻ പരിശോധിക്കും, ബുക്ക് ഇല്ലെങ്കിൽ എന്തു ചെയ്യുമെന്ന് അപ്പോഴെ പറയാൻ പറ്റു. എന്തായാലും സ്കൂളിലെ പോലെ വഴക്കും അടിയും ഇരുട്ടിപ്പിടുത്തവും കൂടെ ഓടി കയറേത്തട്ടിവീഴലും നിർത്തിപ്പൊരിക്കലും ഇല്ല . ചെറിയ രീതിയിൽ ഇരുത്തി പൊരിക്കൽ ചിലപ്പോൾ ഉണ്ടായേക്കാം

പിന്നെ ക്ളാസിൽ കയറുന്ന സമയം. അധ്യാപകർ ബല്ലടിക്കും മുമ്പേ ക്ളാസിലെത്തും എന്നൊക്കെ നിങ്ങൾ ചിലരിൽ നിന്ന് കേൾക്കാനിടയുണ്ട്. പക്ഷെ എൻ്റെ രിതിയിൽ ചെറിയ മാറ്റമുണ്ട്.

ബല്ലടിച്ചു കഴിഞ്ഞാലെ ക്ളാസിലെത്തൂ പക്ഷെ അര മിനിട്ടിൽ കൂടുതൽ വൈകില്ല. എന്തുകൊണ്ടങ്ങനെയെന്നു ചോദിച്ചാൽ വിദ്യർത്ഥികൾ അധ്യാപകനെ പുറത്ത് നിന്ന് ആനയിച്ച്  അകത്തു കയറ്റുന്നതിനോടു താല്പര്യമല്ല. വിദ്യാർത്ഥികൾ ക്ളാസിൽ ഉണ്ടായിരിക്കണം, വൈകി ക്‌ളാസിൽ എത്താനും പാടില്ല.ജനുവിൻ വൈകലിന് അതിൻ്റേതായ പരിഗണന കിട്ടും.

അധ്യാപകൻ ക്ളാസിൽ പ്ളാറ്റഫോമിലോട്ടു കയറുമ്പോൾ എഴുന്നേറ്റു നിന്നു ബഹുമാനം കാണിക്കുന്നത് നല്ല ശീലമാണ്.

പിന്നെ ക്ളാസ് നിർത്തുന്ന കാര്യം. ക്ളാസ് പിരിയാനുള്ള ബല്ലടിച്ചാൽ അപ്പോൾ നിർത്തും . തുടർ ധാരകോരൽ ഇല്ല. ക്ളാസിൻ്റെ അവസാനം "ഇൻഡ്യ ഈസ് മൈ കൺട്രി " എന്നു പൂർണ്ണ മാക്കാൻ കഴിഞ്ഞില്ലെങ്കിൽ കൺട്രി അ ടുത്ത ക്ളാസിൽ പറയും.  അതു കൊണ്ട്, ഇങ്ങേരെപ്പോഴാണ് ക്ളാസ് നിർത്തുന്നത് എന്ന ചിന്ത ഈ ഇരിക്കുന്ന 90 പേരിൽ  ആർക്കും തന്നെവേണ്ട.

രാവിലെ കാണുമ്പോൾ ഒരു ഗുഡ് മോണിംഗ് കേൾക്കുന്നത് സന്തോഷകള്ള കാര്യമാണ്, എന്നുവെച്ച് ഒരേ ദിവസം തുടരെത്തുടരെ ഗുഡ് മോണിംഗ് പറഞ്ഞ് ബോറടിപ്പിക്കരുത്.

അപ്പോൾ നമുക്ക് ക്ളാസ് തുടങ്ങിയേക്കാം അല്ലേ? ടേക്ക് യുവർ നോട്ടു ബുക്ക്.

എൻ ബി :
2000 എ ഡി ക്ക് മുമ്പ് ഇതൊക്കെ കേട്ടു വിരണ്ടവരും വിരളില്ല എന്നു നടിച്ചവരും ഇന്ന് കുഞ്ഞുകുട്ടി പരാധീനങ്ങളുമായി കഴിയുന്നത് കാണുമ്പോൾ നല്ല രസം തോന്നുന്നുണ്ട്
-കെ എ സോളമൻ

Thursday, 31 December 2020

ഓർമ്മകൾ


*വറ്റിയ കരപ്പാടങ്ങളിൽ മഴയോടുകൂടി വെള്ളം നിറയുമ്പോൾ ഒത്തിരി ഞമണിക്ക ഉണ്ടാകും. ഇവ പെറുക്കിയെടുത്ത് വറുത്തരച്ച് കറിവെയ്ക്കും. നല്ല ടേസ്റ്റാണ്, പക്ഷെ ഇതു പാവങ്ങൾക്ക് മാത്രം വിധിക്കപ്പെട്ടതാണ്. ഞമണിക്ക പെറുക്കൽ നാണക്കേടായി കണ്ടവർ ഇതിൻ്റെ ടേസ്റ്റ് അറിഞ്ഞു കാണില്ല. എൻ്റെ അമ്മകറി വെച്ചു തന്ന ഞമണിക്ക കറിയുടെ ടേസ്റ്റ് ഇന്നും നാവിൻതുമ്പിൽ.
ഞമണിക്ക മൂത്താൽ കൊള്ളില്ല

*തിരി പിടുത്തത്തിനു മുമ്പ് അമ്പല കുളത്തിൽ മുങ്ങി ഈറനണിയുന്ന സ്ത്രീകളുടെയും അവർക്കായുള്ള മൈക്ക് അനൗൺസ്മെൻ്റിൻ്റെയും കഥ പ്രസിദ്ധമാണ്. " ആണുങ്ങാ തെക്കേക്കടവിലുടെയും പെണ്ണുങ്ങാ വടക്കേക്കടവിലൂടെയും കുളത്തിൽ ഇറങ്ങേണ്ടതാണ് " ഇതു വകവെക്കാതെ ഇരു കടവിലൂടെയും ഇറങ്ങിയ പെണ്ണുങ്ങളെ കണ്ട അനൗൺസർ മുതലാളി അസിസ്റ്റൻ്റിനോട്  " രാകവാ, സമ്മതിക്കേല ......... കാ (ഭരണിപ്പാട്ടു സ്റ്റൈൽ). മൈക്ക് ഓൺ ആണെന്നതു ഓർത്തില്ല

*അന്നും ടീച്ചർ എന്ന വിളിയുണ്ടായിരുന്നു സ്കൂളുകൾ മറുമ്പോൾ വ്യത്യാസപ്പെടും. തങ്കി സ്കൂളിൽ ഏഴാം ക്ളാസ്സുവരെ എനിക്ക് റിസോളി ടീച്ചർ ഉണ്ടായിരുന്നു. 8 - ൽ കണ്ടമംഗലത്ത് എത്തിയപ്പോൾ രാധ സാർ, ലീലാമണി സാർ, കൗസല്യ സാർ എന്നിവരായി. കൗസല്യ സാറാണ് മലയാള അക്ഷരങ്ങൾ പൂർണ്ണമായും പഠിപ്പിച്ചത്. സാർ എങ്ങനെ മനസ്സിലാക്കിയാവോ എട്ടാംക്ളാസിലെ മുഴുവൻ എണ്ണത്തിനും അക്ഷരങ്ങൾ പൂർണ്ണമായി അറിയില്ലെന്ന് .

*പഴയ തലമുറയിൽ പെട്ട സാധാരണക്കാരായ എല്ലാവരുടെയും കഥ ഇതൊക്കെ തന്നെ. ദേവിയിൽ, അല്ലെങ്കിൽ മാതാവിൽ അതുമല്ലെങ്കിൽ പുണ്യാളച്ചനിൽ എല്ലാം സമർപ്പിച്ചു പ്രാർത്ഥിക്കുക. മരുന്നു പോലും വിശ്വസിച്ച കഴിച്ചാലെ ഫലമുണ്ടാകു. അതു കൊണ്ടു വിശ്വാസത്തിന് അന്നും ഇന്നും ഫലം നഷ്ടപ്പെട്ടിട്ടില്ല. എൻ്റെ അമ്മ മാതാവിനെ വിളിച്ചു പ്രാർത്ഥിച്ചു, അതു കൊണ്ടു ഞാനും. അവിടെ ശാസ്ത്രീയ വിശകലനത്തിന് മുതിരാതിരിക്കുന്നതാണ് നല്ലത്. കണിച്ചുകുളങ്ങര ദേവിയും അർത്തുങ്കൽ പുണ്യാളനും ഒത്തിരി പേരെ സൗഖ്യപ്പെടുത്തിയിട്ടുണ്ട്.
*അന്നത്തെ നാട്ടുമരുന്നുകളുടെ പ്രാധാന്യം ഇന്നു വർദ്ധിച്ചിട്ടേയുള്ളു. പക്ഷെ ഇതു സംബന്ധിച്ച് അറിവുള്ളവരുടെ എണ്ണം കുറഞ്ഞു. മുക്കുറ്റി പോലും തിരിച്ചറിയാനാവാത്ത പുതുതലമുറ. എല്ലാവരും അലോപ്പതിയിലോട്ടു തിരിഞ്ഞു. അതിലെ ചതി കറെ പേരെങ്കിലും തിരിച്ചറിഞ്ഞു തുടങ്ങി. ആയുർവേദവും ഇന്ന് ബിസിനസാണ്‌.
വാഹനവുമായി കുട്ടികൾ പുറത്തിറങ്ങുന്നത് എല്ലാ മുതിർന്നവരിലും ആശങ്കയുളവാക്കുന്നു. അതു തുടരും

*സ്കൂളിൽ ഉപ്പുമാവ് ഉണ്ടായിരുന്നു. പക്ഷെ 4-ാം ക്ളാസ് വരെ മാത്രം. അഞ്ചാം ക്ളാസ് കാരൻ്റെ വിശപ്പ് നാലാം ക്ളാസ് കാരൻ്റെ വിശപ്പിനും മേലെയായിരുന്നുവെന്ന് അന്നത്തെ സ്കൂൾ ഭരണാധികാരികൾക്ക് അറിയില്ലായിരുന്നു. പ്രൈമറി കുട്ടികൾ ഉപ്പുമാവ് കഴിക്കുന്നത് നോക്കി നില്ക്കാനുള്ള വിഷമം കൊണ്ടു പള്ളിയിൽ  പോയി കുറെ നേരമിരിക്കും. അങ്ങനെയിരുന്നാൽ വിശപ്പൊക്കെ താനെ മറക്കും. ഇതു കണ്ട മലയാളം പഠിപ്പിക്കുന്ന റിസോളി ടീച്ചർ എത്രയോ തവണ അവരുടെ മകനോടൊപ്പം വിളിച്ചിരുത്തി ചോറു തന്നിരിക്കുന്നു. ചില മനുഷ്യർ അങ്ങനെയാണ്. ടീച്ചർ വിളിച്ചാൽ ചെല്ലാതിരിക്കാനുള്ള അഭിമാനബോധമൊന്നും അന്നില്ലായിരുന്നു. എല്ലാവർക്കും തോന്നുന്ന പ്രവൃത്തി അല്ലത്

വേറെയും ചില പട്ടിണിക്കാർ കൂടെയുണ്ടായിരുന്നത് ആശ്വാസം. ഒട്ടുമിക്ക മനഷ്യരുടെയും കഥ സമാനമെന്നതുകൊണ്ട് വായിക്കാൻ രസമുണ്ട്.
കഥ തുടരട്ടെ

*പുഴുക്കു വഴിപാട് അർത്ഥവത്തായ ഒന്നാണ്. പൂക്കളും കരിമരുന്നു പ്രയോഗവും പോലെ വേസ്റ്റ് ആകുന്നില്ല.. പുഴുക്കുവഴിപാടിലെ  ചെറിയൊരു പ്രശ്നമെന്തെന്നു വെച്ചാൽ ഓരോരുത്തരുടെ പുഴുക്കിനും ഓരോരോ ടേസ്റ്റ്. ചേരുവകളുടെ ഏറ്റക്കുറച്ചിലാകാം കാരണം. ചിലതിൽ മണ്ണു കടിക്കുകയും ചെയ്യും. പൊങ്കാല അടുപ്പുകൾക്ക് സമീപത്തുകൂടി നടന്നു പോകുന്നവരുടെ കാലിൽനിന്നു കലങ്ങളിലേക്ക് തെറിച്ചു വീഴുന്ന മൺതരികളാണ് മണ്ണു കടിക്കു കാരണം

*ഏറ്റവും അർത്ഥവത്തായ പൂജയാണ് സൂര്യപൂജ.. സൂര്യനമസ്കാരവും അങ്ങനെ തന്നെ. ലോകത്തിലെ സർവ്വ ഊർജത്തിനും ഉറവിടം സൂര്യൻ. സുര്യൻ അടുത്തു വന്നാലും അകന്നാലും ഭൂമിയിൽ ജീവനില്ല, ഇതു ശാസ്ത്രം. അതുകൊണ്ട് സൂര്യഭഗവാനെ ജാതി മതഭേദമെന്യേ പൂജിക്കേണ്ടതാണ്.

ചെറുപ്പത്തിൽ  അടുത്തുള്ള ഡ്റൈവർ തങ്കപ്പൻ സാറിൻ്റെ സൂര്യ പൂജാ ചടങ്ങു നടക്കുന്ന കരപ്പാടത്തായിരുന്നു ഞങ്ങളുടെ നടപ്പും കിടപ്പുമെല്ലാം. രണ്ടു ദിവസത്തെ ഭക്ഷണം കുശാൽ.. 
പൂജാപ്പവും തരും. അപ്പം മുറിച്ച് ഓരോ കഷണം ഓരോ വീട്ടിലും കൊടുക്കും. ഒരു മുഴുവൻ അപ്പം കിട്ടുകയെന്നത് നടക്കില്ല. പക്ഷെ പല വീടുകളിൽ നിന്നാവുമ്പോൾ ഒരപ്പത്തിൽ കൂടുതലൊക്കെ ലഭിക്കും. തങ്കപ്പൻ സാർ ഇന്നില്ല . മക്കൾ പൂജ നടത്തുന്നുണ്ട്. പക്ഷെ പോകാനോ കാണാനോ ഉള്ള ചാൻസ് ഇനിവിരളം

എൻ്റെ പ്രോഗ്രസ് കാർഡ് ഒപ്പിടുന്നതും ഞാൻ തന്നെയായിരുന്നു. അതും അമ്മയെ കാണിച്ചതിനു ശേഷം. ഒരു കുരിശു വരച്ച് വട്ടത്തിലാക്കുന്നതായിരുന്നു ഒപ്പ്. ഒരു വര വട്ടം വരച്ച് നീളത്തിലുള്ള വര താഴെ നിന്ന് കറക്കിക്കൊണ്ടുവന്ന് മുകളിൽ മുട്ടിക്കുക പലപ്പോഴും മുട്ടാറില്ല. ഇത് ഞാൻ മനസ്സിലാക്കിയതിനാൽ എല്ലാ ഒപ്പും ഞാൻ തന്നെയാണ് ഇടുക. കുരിശു വട്ടത്തിനുളളിൽ ആക്കുന്ന ഏതവസരം വന്നാലും ഞാൻ എൻ്റെ അമ്മയെ ഓർക്കും, ഇന്നു പോലും. ഓൺലൈനിൽ തയ്യാറാക്കുന്ന ക്ളാസിൽ എക്സോർ ഗയിറ്റ് എന്നൊരു വിഷയമുണ്ട്. അവിടെ റൗണ്ടിനകത്ത് കരിശിടുന്ന ഏർപ്പാടുണ്ട്. അതു ചെയ്യന്നോൾ തെളിയുന്ന ചിത്രം മറ്റാരുടെ ആകാനാണ്, കൂടെ ഒരു നിശ്വാസവും
*
പുര കെട്ടി മേയുന്നത് ഞങ്ങൾക്കും ഉത്സവമായിരുന്നു. ആറുകാൽ പുര കെട്ടി മേയാൻ 3-4 പേർ കാണും. എല്ലാവർക്കും നല്ല ഭക്ഷണവും കൂലിയും. കടക്കരപ്പള്ളി മാർക്കറ്റിൽ അന്നു കിട്ടുന്ന ഏറ്റവും നല്ല മീൻ വാങ്ങും. അമ്മ നന്നായി മീൻ കറിവെയ്ക്കും. പുര കെട്ടുകാർക്ക് ഉച്ചയക്ക് പന്തിഭോജനമാണ്. അമ്മ മക്കളെയും പണിക്കാരുടെ കൂടെയിരുത്തും. പന്തിയിൽ പക്ഷാ ഭേദമില്ല എല്ലാ പുരകെട്ടി മേയലും നല്ല ഭക്ഷണത്തിൻ്റെ ദിവസങ്ങളായിരുന്നു. ഇതു ഞാൻ ബി എസ് സി രണ്ടാം വർഷം പഠിക്കുന്നതുവരെ തുടർന്നു. അതിനു ശേഷമാണ് ഇഷ്ടിക കെട്ടി രണ്ടു മുറി വീടുണ്ടാക്കിയത്. തേയ്ക്കാൻ കുമ്മായം വാങ്ങാൻ കാശില്ലാതിരുന്നതിനാൽ കുറെ നാൾ അങ്ങനെ കിടന്നു. ജനലുമില്ലായിരുന്നു. പഴന്തുണികൊണ്ടു മറച്ചാലും ജനലിലൂടെ അരിച്ചു വരുന്ന ഡിസംബറിലെ മരം കോച്ചുന്ന തണുപ്പ് സഹിക്കാവുന്നതിനുമപ്പുറം. കറണ്ടുകിട്ടാൻ പിന്നെയും കാലം പിടിച്ചു. പെർമിഷന് വിസമ്മതിച്ച അയൽക്കാരനെ സാന്ത്വനപ്പെടുത്താൻ ആദ്യമായി ഞാൻ കളക്ടറെ നേരിൽ പോയി കണ്ടു.

പിന്നെ തൊണ്ടു തല്ലിൻ്റെ കാര്യം, അതു കഥനകഥയാണ്. അതൊക്കെ എഴുതി ഹരികുമാറിൻ്റെ കഥയുടെഒഴുക്കിന് തടസ്സമുണ്ടാക്കുന്നില്ല.
ഒരു തരത്തിൽ സാറും അമ്മുമ്മയും ഭാഗ്യം ചെയ്തവരാണ്. സ്വന്തമായി തെങ്ങും പുരയിടവുമൊക്കെ ഉണ്ടായിരുന്നല്ലോ? ഇതൊന്നുമില്ലാത്ത കുടികിടപ്പുകാരൻ്റെ അവസ്ഥയെക്കുറിച്ച് ചിന്തിക്കേണ്ടി വന്നിട്ടുണ്ടോ?
 ഞങ്ങൾ കുടികിടപ്പായിരുന്നു.. രണ്ടാം മാസം തെങ്ങുകയറാൻ മൊതലാളൻ വരുമ്പോൾ 10 തേങ്ങ ആനുകൂല്യം.. പക്ഷെ കുല വെട്ടിയിടുമ്പോൾ നല്ല തേങ്ങയൊക്കെ മാറ്റിയിടീക്കും. അവയ്ക്ക് വെളിച്ചെണ്ണ തേങ്ങയെന്ന് ഓമനപ്പേർ. മറ്റു തേങ്ങകളിൽ നിന്ന് വെളിച്ചെണ്ണ കിട്ടില്ലേ എന്ന് ആരോടു ചോദിക്കാൻ? കുടികിടപ്പവകാശത്തിൽ വെളിച്ചെണ്ണ തേങ്ങ ഉൾപ്പെടില്ല. ഓരോരോ തമാശകൾ

വേനൽക്കാലത്ത് തെങ്ങുകൾ നനയ്ക്കുന്നതിന് പ്രത്യേകം തേങ്ങ തരും. ഒരു തെങ്ങിന് നാലു തൂക്കു വെള്ളം. മൺകുട മാണ് ഉപയോഗിച്ചിരുന്നത്. അലൂമിനിയം കുടം പ്രചാരത്തിലില്ല. എല്ലാ തെങ്ങിനും നാലു തൂക്കം വെള്ളം തീർത്തും ഒഴിക്കണമെന്ന് എൻ്റെ അമ്മയ്ക്ക് നിർബ്ബന്ധമുണ്ടായിരുന്നു, ഒരു തൂക്കു രണ്ടു കുടം. അതു തെങ്ങുകളോടുള്ള സ്നേഹം കൊണ്ടു തന്നെയായിരുന്നു. ഇതിനൊക്കെ മാറ്റം വന്നത് പത്ത് സെൻ്റ് അവകാശം കിട്ടിയതോടെയാണ്. പത്തു സെൻ്റ് അനുവദിച്ചതിൻ്റെ എല്ലാം കെഡിറ്റും, മറ്റാരു തന്നെ അവകാശവാദമുന്നയിച്ചാലും, കെ.ആർ ഗൗരിയമ്മയ്ക്ക് കൊടുക്കാൻ ഞാൻ ആഗ്രഹിക്കുന്നു. എൻ്റെ അമ്മയുടെ എല്ലാ കാലത്തേയും വോട്ട് ഗാരിയമ്മയ്ക്കായിരുന്നു.

അതിരിക്കട്ടെ, അമ്മുമ്മയെ പറ്റിയല്ലാതെ അമ്മയെക്കുറിച്ച് ഒന്നും പറയാത്തത് എന്ത്?

*സമാന്തര രേഖകളിലെ താഴെത്തെ ലൈനിൽ ഇതു കൂടി ചേർത്തു വായിക്കാവുന്നതാണ്. ഞാൻ ആശാൻ കളരി കണ്ടിട്ടില്ല. പൂജയെടുപ്പിന് അമ്മ സ്കൂളിലെത്തിച്ചു. വൃശ്ചികം 6 (നവം 22) എന്ന ജനനത്തീയതി അമ്മ കൃത്യമായി പറഞ്ഞെങ്കിലും സ്കൂൾ അധികൃതർ പത്തു മാസതോളം പുറകോട്ടു മാറ്റി ഫെബ്രു 13 ആക്കി. അങ്ങനെയാണ് 13 എൻ്റെ ലക്കീ നമ്പർ ആയത്.
ദൈവത്തിൻ്റെ കണക്കിൽ പെടാതെ ഏകദേശം ഒരു കൊല്ലം നഷ്ടം. ഇത് പലരുടെയും കേസിൽ സംഭവിച്ചിട്ടുള്ളതാണ്. 

5 മാസം തുടർച്ചയായി ഒന്നാം ക്ളാസിൽ ഇരുന്നിട്ടും കുറെ കഞ്ഞിയും കപ്പക്കുഴയും കഴിച്ചതല്ലാതെ ഒരക്ഷരം പഠിച്ചില്ല. വാർഷിക പരീക്ഷയിൽ 1 എന്ന് എഴുതാൻ അറിയാഞ്ഞിട്ട് ഹെഡ്മാസ്റ്ററുടെ പൂരത്തല്ല്. വലിയ വായിൽ നിലവിളിച്ച നില്ക്കുന്ന ഒരുകൂട്ടി,  ഇപ്പോഴും ആ രംഗം മനസ്സിൽ ഓടിയെത്തും. അറിഞ്ഞിട്ട് വേണ്ടേ 1 എന്നു വരയ്ക്കാൻ . ആരോ പുറകിൽ നിന്ന് പറഞ്ഞു ഒരു വര സ്ളേറ്റിൽ വരക്കാൻ . ഇല്ല, അതുപറഞ്ഞുതന്ന ആളെ എനിക്കോർമ്മയുണ്ട്. നീളത്തിൽ ഞാൻ വരച്ച വരയാണ് ഹെഡ്മാസ്റ്ററുടെ കലിയടക്കിയത്.
വളരെ ദാരുണമായ, ദയനീയമായ സംഭവങ്ങൾ വേറെയും. നന്ദികേടു് എന്ന് വിവക്ഷിക്കുമെങ്കിലും സത്യം സത്യമല്ലാതാകുന്നില്ല.
5 മുതലാണ് എന്തെങ്കിലും പഠിച്ചു തുടങ്ങിയത്.  ABCD..... മുഴുവൻ അഞ്ചാം ക്ളാസിൽ  കൂട്ടുകാരൻ പഠിപ്പിച്ചു. മലയാള അക്ഷരങ്ങൾ മുഴുവൻ കണ്ടമംഗലം ഹൈസ്കൂളിലെ കൗസല്യ സാർ എട്ടാം ക്ളാസിൽ പഠിപ്പിച്ചു.

അന്നൊക്കെ കൂടുതൽ വിജ്ഞാനമുണ്ടായിരുന്ന എൻ്റെ സഹപാഠികൾ തേങ്ങാ വെട്ടും കൊപ്രാ കച്ചവടവുമായി കൂടി. എനിക്ക് ഇങ്ങനെയൊരു വിധി. ദൈവമുണ്ടെന്ന് ഒത്തിരി തവണ തോന്നിയിട്ടുണ്ട്‌.

Wednesday, 18 November 2020

ഒറ്റമരം


പടർന്നാകെ പന്തലിച്ചുള്ള ശിഖരങ്ങളും കാറ്റത്തിളികിയാടുന്നൊരിലകളും പൂക്കളും
ഇടയിലൂർന്നിറങ്ങും സൂര്യ കിരണങ്ങളും
ചേർന്നോരുലകമായ് നില്ക്കുമീ ഒറ്റമരം

കിളികളേനേകം വന്നു പോയെന്നാകിലും
കടൽത്തിര പോലെ വന്നു പിന്നെയും കൂട്ടുകാർ
കണ്ണീരുറഞ്ഞ വയോധികരും പുതുസ്വപ്ന
സഞ്ചാരികളും വന്നാശ്വസിച്ചീടുന്നു.

ഒരു നല്ലകാലം വരുമെന്ന്  കാണുവാൻ.   
ഇനിയില്ല മോഹവും മോഹഭംഗങ്ങളും
ഈ തീരത്തിങ്ങനെ ഏതാനും നാൾ കൂടി
നിന്നിട്ടു ശാന്തമായി താനേ മറഞ്ഞീടാം
-കെ എ സോളമൻ

..

Tuesday, 18 August 2020

പ്രതീക്ഷ - കഥ


'കുഞ്ഞൂട്ടി , കുഞ്ഞൂട്ടി?'

' എന്താച്ചാ'

നീ എന്തെടുക്കവാ?

എന്താച്ചാ കാര്യം?

നനക്ക്  എന്നതാണ് വേണ്ടത്?

അച്ചൻ കാര്യാന്താന്നു പറ.

ഈ ഇരിക്കുന്ന ചിക്കുപായെല്ലാം വിറ്റു കാശു കിട്ടുമ്പോൾ അച്ചൻ നനക്ക് എന്നതാ വാങ്ങിത്തരേണ്ടത്.

എപ്പഴാ വിൽക്കുന്നത്?

അതു ഞാൻ പറഞ്ഞിട്ടുണ്ടല്ലോ? പള്ളിപ്പുറത്തമ്മയുടെ പെരുനാളു വരുമ്പോ, ആഗസ്റ്റ് 15 ന്

എനിക്കൊരു മഞ്ഞച്ചുരിദാർ മതി, അച്ചാ

മഞ്ഞച്ചുരിദാറോ  , പ്പോ, ചൂച്ചൂന് എന്തു ട്ട് വേണം?

അവൾക്ക് ഉടുപ്പ് മതിയെന്ന് .

അപ്പോ അനുവിനോ?

അവള് കൊച്ചല്ലേ അച്ചാ, ദേ,. ചിരിച്ചോണ്ടിരിക്കുവാ?

അവൾക്കും ഒരു മഞ്ഞ ഉടുപ്പു വാങ്ങാം, ല്ലേ ?

അച്ചൻ വാങ്ങിത്തരാതിരിക്കുമോ?

ഇല്ല മോളെ, ഇതെല്ലാം വിറ്റു കാശു കിട്ടട്ടെ. നിൻ്റെ മ്മക്കും ഒരു സാരി വാങ്ങി ക്കൊടുക്കണം

"അച്ചനും  വേണം നല്ലഒരു മുണ്ടും ഷർട്ടും
ഉം, നമുക്കൊരുമിച്ചു പോയ് വേണം വാങ്ങാൻ " കുഞ്ഞുട്ടി

കുമാരൻ്റെയും മകൾ കുഞ്ഞൂട്ടിയുടേയും സംഭാഷണം അങ്ങനെ നീണ്ടുനീണ്ടു പോയി.

അനിൽ കുമാർ എന്ന് പേര്. കുമാരൻ എന്ന് നാട്ടുകാർ വിളിക്കും. വാർപ്പു പണി യായിരുന്നു. 

ലോകത്തെ മുഴുവനായി ഞെട്ടിച്ച് കോ വിഡ് രോഗം വ്യാപകമായതോടെ അയാൾക്ക് പണിയില്ലാതായി. ചിട്ടി അടവുൾപ്പെടെ എല്ലാം മുടങ്ങി

താത്കാലിക ആശ്വാസത്തിനാണ്  കായൽ ഇറമ്പത്തെ  കൈതോല വെട്ടി പായ് നെയ്ത്  ഭാഗ്യം കൂട്ടി വെച്ചത്. പള്ളിപ്പുറത്തമ്മയുടെ പെരുന്നാളിനു വില്ക്കണം
                      * * * * *
'അച്ചാ അച്ചാ?'
എന്താ, കുഞ്ഞൂട്ടി?
ഇന്നല്ലേ, ആഗസ്റ്റ് 15, ഞങ്ങട ടീച്ചർ  മൊബീലിൽ പറഞ്ഞു. ചുരിദാർ വാങ്ങണ്ടേ?

അതിന് പായ് വിറ്റില്ലല്ലോ മകളേ,, വില്ക്കാൻ പാടില്ലെന്ന്. സർക്കാരിൻ്റെ വിലക്കുണ്ട്, രോഗം പടരും

അപ്പോ, എന്തു ചെയ്യും, അച്ചാ ?

"നമുക്ക് മുത്തിയമ്മയുടെ പെരുന്നാളിന്  വില്ക്കാം, വെച്ചൂര് നമുക്കൊരുമിച്ചു പോകാം, അടുത്ത മാസമാണ് പെരുന്നാൾ. രോഗമൊക്കെ അപ്പോഴെക്കും മാറും. മോളു വിഷമിക്കണ്ടാ, ട്ടോ " മകളുടെ പ്രതീക്ഷ അയാൾ വിമാനത്തിലേറ്റി. ഒപ്പം അയാളുടെ പ്രതീക്ഷയും

സംശയത്തോടെ നോക്കുന്ന മകളുടെ കണ്ണുകളിലേക്ക് ദയനീയമായ നോട്ടം പായിച്ച്. ആശ്വസിപ്പിക്കാനെന്ന വണ്ണം അവളുടെ മുടിയിൽ  അയാൾ സാവകാശം തലോടി.

അച്ചന് വിഷമം തോന്നാതിരിക്കാൻ എല്ലാം സമ്മതിച്ചെന്ന മട്ടിൽ ആ മുന്നാം ക്ളാസ്കാരി ചെറുതായി പുഞ്ചിരിച്ചു.

                       ....................