ഈ നാടിന്റെ പ്രജ- കവിത –കെ എ സോളമന്‍

ഞാന്‍

അന്ധകാരത്തിൻറെ ഉടമകളും

ആര്‍ത്തിയുടെ ഇരിക്കപ്പിണ്ഡങ്ങളും

അലഞ്ഞു തിരിയുന്ന നായ്ക്കളും

കീഴ്പ്പെടുത്തിയ പ്രജ.

ഈ നാടിന്റെ അടിമയായ പ്രജ

എൻറെ കണ്ണുകളിൽ അഗ്നിയുണ്ട്

ഹൃയത്തില്‍ ആര്‍ത്തിരമ്പും കടലുണ്ട്

ഉഷ്ണക്കാറ്റാവും ശ്വാസമാണു ഞാന്‍

മുള്ളിന്‍ മുനയുടെപ്രതിരോധവും 

ഇല്ല, ഞാനൊരു അടിമയാണ്..

അഴിമതി പേക്കോലങ്ങളുടെഅടിമ  
ആർത്തിരമ്പുന്ന കടലും,
അലഞ്ഞുചുറ്റുന്ന കാറ്റും, ഇല്ല

ശൂന്യമാണ് ഇന്നെൻറെ ഹൃദയം

ഞാന്‍
ശ്വാസക്കാറ്റിൻറെ അഗ്നിച്ചൂളയിൽ

ജീവിക്കാന്‍ തെല്ലു മോഹമില്ലാതെ

ഇടനെഞ്ചുരുകിരുകി വിതുമ്പുന്ന

ഹൃദയം കല്ലാക്കിമാറ്റിയ

കേവലനാം പ്രജ.

മിഴിനീരില്‍ മുങ്ങിയ ജീവിതം

വിലക്കിന്‍ വിലങ്ങുകളുമായി   
ആരുടെയോ നല്ല നാളേയ്ക്കായി
ഉള്ളം വിറങ്ങലിപ്പിച്ചു

കാത്തിരിക്കുന്ന പ്രജ

ഞാനും നിന്നെപ്പോലെ പ്രജയാണ്

ഈ നാടിന്റെ അടിമയായ പ്രജ